Яднаючая сіла "Каложскага Благавеста"

На мінулым тыдні ў раённым цэнтры культуры і народнай творчасці праходзіў адборачны тур ХVІІ Міжнароднага фестывалю царкоўных спеваў “Каложскі Благавест”. Мастацкія калектывы, свецкія і царкоўныя хары з’ехаліся са Шчучынскага і Мастоўскага раёнаў, каб прадэманстраваць сваё мастацтва. Сярод удзельнікаў – народны ансамбль духоўных спеваў “Преображение” Шчучынскага РЦКіНТ, хары Мастоўскіх храмаў, самабытны ансамбль царквы Свяціцеля Мікалая Цудатворца вёскі Турэйск, які ў рамках фестывалю “Каложскі Благавест” ужо ўдастойваўся ўзнагароды за захаванне народных традыцый у царкоўных спевах. 

Усяго ў рэгіянальным адборачным туры прынялі ўдзел 25 калектываў – з Ражанкі і Орлі, Дубна і Лунна, многіх іншых аграгарадкоў і вёсак нашага прынеманскага краю. На суд журы, старшынёй якога з’яўляецца протаіерэй Андрэй Бандарэнка – клірык Свята-Пакроўскага кафедральнага сабора г. Гродна, член Беларускага саюза кампазітараў, лаўрэат Дзяржаўнай прэміі Рэспублікі Беларусь і прэміі “За духоўнае адраджэнне”, удзельнікі вынеслі народныя і царкоўныя песні, а таксама класічныя творы. 
Прысутных на гэтым свяце душы віталі благачынны Шчучынскай акругі іерэй Аляксандр Пасцерняк і намеснік старшыні Шчучынскага райвыканкама Ганна Станіславаўна Хвядзюк. Яны павіншавалі ўсіх са светлым святам Раства Хрыстова, пажадалі канкурсантам цалкам раскрыць свой творчы патэнцыял. Сімвалічным было і тое, што адкрываў праграму дзіцячы хор Шчучынскай Свята-Міхайлаўскай царквы “Каляднай песняй” і творам “Прыходзьце ў храм”.
“Каложскі Благавест” бярэ свае вытокі з 2002 года, калі ў нашым абласным цэнтры прайшоў першы фестываль, прысвечаны 10-годдзю адраджэння Гродзенскай Праваслаўнай епархіі. З таго часу гэты песенны форум праводзіцца штогод. Яго арганізатарам выступае як Гродзенская епархія, так і галоўнае ўпраўленне ідэалагічнай работы, культуры і па справах моладзі аблвыканкама. Пасля таго, як адборачныя туры пройдуць ва ўсіх рэгіёнах Гродзеншчыны, лепшыя творчыя калектывы будуць выступаць на абласной фестывальнай сцэне. А тое, што цікаўнасць да “Каложскага Благавесту” расце з кожным годам, яскрава сведчыць жаданне ўдзельнічаць у духоўным форуме прадстаўнікоў з іншых краін.
Падводзячы вынікі адборачнага тура, старшыня журы протаіерэй Андрэй Бандарэнка выказаў словы ўдзячнасці шчучынцам за высокі ўзровень арганізацыі конкурсных праслухванняў і адзначыў майстэрства такіх творчых калектываў, як дзіцячы хор царквы святога Архістратыга Міхаіла г. Шчучына, якім кіруе Вераніка Бялайц, хор нашага храма абшчыны Богаяўлення, рэгентам якога з’яўляецца Наталля Яўтушак, а таксама дзіцячы і дарослы калектывы Мастоўскага храма ў гонар іконы Божай Маці “Всех скорбящих радость”. Сваімі шчырымі, пранікнёнымі спевамі пакарылі журы і прыхаджане Ракавіцкай і Мураванскай цэркваў. Дый увогуле духоўная музыка не пакідала раўнадушным ні аднаго чалавека. Дарэчы, на гэты незвычайны канцэрт сабраліся як аматары высокага мастацтва, так і святары, сярод якіх – настаяцель касцёла святой Тэрэзы Авільскай Вітольд Пяцельчыц. “Каложскі Благавест” яднае сэрцы людзей розных канфесій. 

Таццяна СТУПАКЕВІЧ.

Фота аўтара.

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Fill in the blank.