У нядзелю, 20 мая, у 19.00 шчучынцаў і гасцей горада запрашаюць на канцэрт самадзейныя артысты Руткевіцкага сельскага Дома культуры. На пляцоўцы ля фантана ў гарадскім скверы яны выступяць з праграмай “Для вас – нашы лепшыя песні!” Майскі вечар абяцае быць цікавым і душэўным. Прыміце запрашэнне і атрымайце асалоду ад любімых мелодый!

 

 Штогадовае Пасланне Прэзідэнта Аляксандра Рыгоравіча Лукашэнкі беларускаму народу і Нацыянальнаму сходу як заўжды выклікала непадробную цікавасць у кожнага жыхара краіны. Бо ўсё, аб чым гаварылася ў ім, сугучна з нашымі думкамі, планамі і надзеямі. Галоўнае прызначэнне дзяржавы А.Р. Лукашэнка бачыць у тым, “каб стымуляваць прагрэс ва ўсіх сферах, забяспечваць сацыяльныя гарантыі грамадзянам, ствараць прававыя асновы жыццядзейнасці”. І на гэтым шляху Беларусь прайшла ўжо нямала. Па прыклады, дарэчы, хадзіць далёка не трэба. Абуладкаванне аграгарадкоў, будаўніцтва сучасных малочнатаварных комплексаў, навядзенне парадку на зямлі – правільнасць гэтых і іншых напрамкаў развіцця пацвярджае час.

Адабрэнне курсу дзяржавы выказалі і жыхары нашага раёна, якія ў мінулы чацвер прыйшлі на сустрэчу з членамі інфармацыйна-прапагандысцкіх груп райвыканкама. Галоўнай тэмай для абмеркавання падчас адзінага дня інфармавання якраз і стала прэзідэнцкае Пасланне народу і Нацыянальнаму сходу. Размова вялася ў кантэксце з надзённымі праблемамі, якія хвалююць шчучынцаў. У прыватнасці, закраналіся пытанні падтрымкі і абароны дзяцей у нядобранадзейных сем’ях, абмяркоўвалася работа народнагаспадарчага комплексу раёна за чатыры месяцы бягучага года. Не засталіся па-за ўвагай меры, якія прадпрымаюць праваахоўныя органы для ўмацавання правапарадку, паляпшэння крымінагеннай абстаноўкі на тэрыторыі Шчучыншчыны. Члены інфармацыйных груп расказалі вяскоўцам аб падрыхтоўцы да святкавання 50-годдзя з дня прысваення Шчучыну статуса горада. Зацікаўленыя сустрэчы прайшлі з жыхарамі вёскі Бершты і аграгарадка Дэмбрава, работнікамі малочнатаварнага комплексу “Галавічполе” і малочнатаварнай фермы “Жылічы”, калектывамі ДУА “Матыльская базавая школа” і “ВПК Каменскі дзіцячы сад – сярэдняя школа”.

Кожны раз, калі бываю ў Ражанцы, як магнітам цягне ў бібліятэку. А чаму б сюды не заглянуць? Яшчэ з парога цябе сустрэнуць ветлівай усмешкай загадчыца сельскай бібліятэкі Яніна Яўгенаўна Каранкевіч і бібліятэкар Ганна Іосіфаўна Орсік. Яны заўсёды дапамогуць выбраць літаратуру, падбяруць часопісы, да кожнага чытача, дарослага ці маленькага, знойдуць падыход.
У бібліятэцы ўтульна, многа кветак. Для самых маленькіх наведвальнікаў аформлены дзіцячы куток, дзе шмат мяккіх цацак. Інтарэсы чытачоў задаволіць багаты кніжны фонд, разнастайныя часопісы і газеты. У бібліятэцы ёсць мультымедыйны цэнтр з выхадам у інтэрнэт. Тут можна скарыстацца ксераксам, зрабіць копіі патрэбных дакументаў – бібліятэка аказвае больш за 30 відаў платных паслуг.
Сярод карыстальнікаў бібліятэкі не толькі ражанкаўцы, але і жыхары навакольных вёсак. Для іх арганізаваны падворны абход, а ў вёсцы Гірдзеўка працуе “перасоўка”.

У рамках спартакіяды “Каласок” у Лідзе прайшоў фінал абласных спаборніцтваў па валейболе сярод дзяўчынак 1996-1997 года нараджэння. Шчучынская каманда вярнулася з перамогай.
На першым этапе ў спаборніцтвах прымалі ўдзел 17 каманд, з якіх толькі пяць выйшлі ў фінал. Акрамя нашых валейбалістак у фінальную частку спаборніцтваў трапілі спартсменкі з Карэліцкага, Ваўкавыскага, Ашмянскага і Лідскага раёнаў.
Матчы прайшлі надзвычай цікава і напружана, пры гарачай падтрымцы балельшчыкаў. Ніводная з каманд не хацела саступаць. Нашы валейбалісткі паказалі прыгожую і зладжаную гульню, перамаглі ўсіх сапернікаў і занялі першае месца. Высокі ўзровень майстэрства і фізічнай падрыхтоўкі прадэманстравалі Крысціна Туля, Наталля Ненартовіч, Наталля Станкевіч, Вераніка Ціцяк, Алеся Кавалеўская, Анастасія Смогур, Валянціна Сакель. У поспехах дзяўчынак вялікая заслуга іх трэнера Міхаіла Міхайлавіча Жоглы. Пераможцы былі ўзнагароджаны Кубкам, медалямі і каштоўнымі падарункамі.
Між іншым, хутка шчучынскія валейбалісткі адправяцца ў Пружаны, дзе будуць адстойваць гонар Гродзенскай вобласці на рэспубліканскіх спаборніцтвах “Каласок”. Жадаем нашым спартсменкам удачы, выдатнай гульні і новых перамог!

Больш за 2000 дзяцей Шчучыншчыны адпачнуць сёлета ў летніх лагерах, якія будуць дзейнічаць на тэрыторыі нашага раёна.
– З 4 чэрвеня пачынаюць працаваць прышкольныя лагеры, – расказвае галоўны спецыяліст аддзела адукацыі Вольга Пятроўна Чыжык. – Змены будуць доўжыцца па 18 дзён. Бацькоўскі ўзнос залежыць ад узросту дзіцяці: за дзіця 6-10 год неабходна ўнесці 70000 рублёў, ад 11 да 13 год – 100000 рублёў, ад 14 да 18 год – 120000 рублёў. Упершыню лагер з дзённым знаходжаннем будзе адкрыты ў гімназіі. Наведваць яго могуць дзеці, у якіх ёсць жаданне прадоўжыць вучэбны працэс.
У чатыры змены сёлета будзе працаваць аздараўленчы лагер “Касмадром”. Першымі туды накіруюцца самыя крэатыўныя і актыўныя: выхаванцы цэнтра творчасці дзяцей і моладзі, Васілішкаўскага і Астрынскага цэнтраў пазашкольнай работы, станцыі дзіцячай і юнацкай тэхнічнай творчасці і іншыя. У трэцюю змену, якая будзе працаваць пад дэвізам “Мы будуем горад Экаград”, паедуць адпачываць аматары прыроды. А завершаць сёлетні сезон спартсмены. Пуцёўкі, як заўсёды, выдаюцца па месцы работы бацькоў. Толькі для дзяцей з прыёмных і апякунскіх сем’яў па пуцёўкі неабходна звяртацца ў аддзел адукацыі.
У гэтым годзе будуць працаваць бясплатныя лагеры з кругласутачным знаходжаннем для дзяцей 6-7 год. У дзіцячым садку №7 у Шчучыне адпачнуць 40 чалавек, у дашкольным Цэнтры развіцця дзіцяці аграгарадка Васілішкі – 20 чалавек і ў яслях-садзе г.п. Астрына – 20 чалавек.