Своечасова ўбраць і якасна захаваць

У ААТ “Васілішкі” актыўна прыступілі да ўборкі капусты, пад якую сёлета адведзена 20 гектараў. Згодна з сучаснай кан’юнктурай рынку плошчу пад гэтую культуру ў параўнанні з мінулым годам мясцовыя аграрыі скарацілі, аднак ураджай тут плануюць атрымаць не меншы, чым летась. 

– Вы паглядзіце, якія вялікія качаны! – зазначае работніца сада Ірына Валяр’янаўна Ашмянчук. – Некаторыя дасягаюць вагі 10 кілаграмаў. Такі ўраджай збіраць – адно задавальненне. Мы акуратна загружаем капусту ў спецыяльныя кантэйнеры. Падгніўшыя качаны выбракоўваем, бо яны дрэнна захоўваюцца.
Амаль кожныя паўгадзіны трактары з нагружанымі да верху прычэпамі, нібы цягнікі з вагонамі, дастаўляюць зялёны груз на сховішча, дзе той закладваецца на захоўванне. Сярод тых, хто задзейнічаны на адвозцы капусты – малады механізатар Артур Мусяла.


– Сам я тутэйшы, з вёскі Лычкаўцы, – гаворыць Артур. – Летась пасля заканчэння Лідскага дзяржаўнага прафесіянальнага ліцэя меліярацыйнага будаўніцтва ўладкаваўся трактарыстам у родную гаспадарку. Як кажуць, дзе нарадзіўся – там і спатрэбіўся! Мне даверылі не новы, але выдатна дагледжаны трактар МТЗ-82, якім і кірую. У полі – амаль увесь светлавы дзень. Ну а як іначай? Ураджай чакаць не будзе. Вытрымаць такі напружаны рытм няпроста, але я прывык. Адказна ставіцца да сваіх абавязкаў мяне навучылі бацькі, якія, дарэчы, таксама працуюць у ААТ “Васілішкі”. 


Яшчэ летась у сельгаспрадпрыемстве сярэдняя ўраджайнасць капусты складала 25 тон з гектара. Сёлета, дзякуючы напружанай працы ўсяго калектыву і строгаму выкананню тэхналогій, гэты паказчык ужо дасягнуў 45 тон і працягвае расці. Вось, што называецца, – высокі ўзровень культуры земляробства.
– Сёлета мы адвялі пад капусту найбольш урадлівыя палі, – дзеліцца формулай поспеху загадчык яблыневага саду ААТ “Васілішкі” Пётр Станіслававіч Лютастанскі. – Пры пасадцы выкарыстоўвалі высокапрадукцыйны галандскі гібрыд “леон”, які можа захоўвацца ў кантэйнерах да 8 месяцаў. Каб атрымаць дастойны ўраджай, у поўнай меры апрацавалі капусныя палеткі гербіцыдамі, фунгіцыдамі і інсекціцыдамі. Ды і надвор’е паспрыяла: расліны назапасілі ўдосталь вільгаці, неабходнай ім для росту і развіцця. Усё гэта станоўча адбілася на ўраджайнасці капусты: штодзень мы закладваем на захоўванне да 110 тон качаноў. Такім чынам, нават паменшыўшы плошчы пад гэтую культуру яе валавы збор застанецца амаль на ўзроўні мінулага года. 


У ААТ “Васілішкі” таксама працягваецца копка морквы, пасевы якой сёлета ў гаспадарцы займаюць 10 гектараў. Убраць гэту культуру з палёў васілішкаўскім аграрыям дапамагаюць сезонныя работнікі раённага цэнтра занятасці. Сярод іх і жыхарка Шчучына Л.І. Ташкаджаева.
– Я ўжо другі год убіраю гародніну ў гэтай гаспадарцы і магу сказаць, што працоўны працэс тут арганізаваны на вышэйшым узроўні, – зазначае Лілія Іосіфаўна. – Нас, сезонных работнікаў, у 9.00 цэнтралізавана забіраюць з райцэнтра на аўтобусе і падвозяць прама ў поле, дзе мы і працуем амаль да 18.00. Потым такім жа чынам вяртаюць у Шчучын. У дзень зарабляем каля 16 рублёў. Пры жаданні можна забраць зарплату капустай, бульбай, морквай, цыбуляй і тым самым зрабіць запасы на зіму. 
Усяго на ўборцы гародніны ў ААТ “Васілішкі” задзейнічана прыкладна 60 чалавек і 8 адзінак тэхнікі. Завяршыць збор ураджаю тут плануюць да пачатку лістапада. 
Аляксандр КАСПЯРЧУК.
Фота аўтара.

Голосов пока нет

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Введите ответ (Fill in the blank)