Па закліку сэрца

“Валанцёры – гэта людзі, якія бескарысна, у свой вольны час робяць добрыя справы, вучаць гэтаму іншых і заўжды гатовы прыйсці на дапамогу”, – гаворыць старшыня раённай арганізацыі Беларускага таварыства Чырвонага Крыжа Галіна Станіславаўна Мацюк. 
Па яе словах, у нашым раёне валанцёрства мае моцныя традыцыі. Даўно і актыўна працуюць валанцёрскія “ячэйкі” ў гімназіі, другой і трэцяй гарадскіх школах, ва ўстановах адукацыі ў Васілішках, Жалудку, Галавічполі... Каардынуе работу грамадскіх актывістаў раённы савет, які ўзначальвае педагог СШ №1 г. Шчучына А.У. Крэчка.
– Нашы дабравольныя памочнікі ўдзельнічаюць у сацыяльна значных для грамадства акцыях “Мяняем цукеркі на цыгарэты”, “Кроў у імя жыцця”, “Здароўе – бясцэнны дар” і іншых. У гімназіі і СШ №1 “прыжыліся” восеньскія акцыі “Збяром дзяцей у школу” і “Клопат”, пераднавагодняя “Ёлка жаданняў”, – расказвае Г.С. Мацюк. – Хлопчыкі і дзяўчынкі ў майках з лагатыпам Чырвонага крыжа – частыя госці ў сацыяльна-педагагічным цэнтры і дамах-інтэрнатах. Як прыклад сацыяльна значнай работы – галавічпольскі і астрынскі валанцёрскія атрады, якія ўзялі шэфства над падапечнымі гэтых устаноў, а таксама над адзінокімі землякамі, інвалідамі. Рабяты дапамагаюць нямоглым дзядулям і бабулям справіцца з бытавымі праблемамі, не страціць адчуванне радасці жыцця. Да таго ж школьнікі-валанцёры з Астрыны ў рамках сумеснай з мясцовай бібліятэкай акцыі “Увайдзі ў кожны дом” з кнігамі ў руках наведваюцца да патэнцыяльных чытачоў. Актыўныя маладыя людзі, чыімі праваднікамі па жыцці сталі міласэрнасць і спагада, уносяць свой уклад у прапаганду здаровага ладу жыцця, прафілактыку наркаманіі і ВІЧ/СНІДу сярод сваіх равеснікаў.
Багаж добрых спраў дазволіў валанцёрскім атрадам з Галавічпольскага д/с-СШ, гімназіі і СШ №1 г. Шчучына прыняць удзел у абласным конкурсе “Лепшы валанцёр”.
Кажуць, валанцёр – гэта стан душы, які застаецца назаўсёды. Таму, відаць, у радах грамадскіх актывістаў можна ўбачыць і людзей сталага ўзросту. Яны блізка да сэрца ўспрымаюць чужую бяду, добра ведаючы, дзеля чаго і як важна рабіць дабро. І на справе дапамагаюць пераадолець жыццёвыя цяжкасці сваім суседзям, апякуюць нямоглых знаёмых. Менавіта такія актывісты ўваходзяць у склад клуба “Апора”, які даўно дзейнічае пры раённай арганізацыі Чырвонага Крыжа. Так,  пачуццё сваёй патрэбнасці іншым людзям уласціва Яніне Капіца, Людміле Мілейка і Таццяне Шахаўцовай.
Цяпер у валанцёрскіх “ячэйках” раённай чырванакрыжнай арганізацыі звыш паўтары сотні членаў. І яе дзверы заўжды адчынены для дабравольных памочнікаў, падкрэслівае Г.С. Мацюк. “Кожны чалавек са спагадай і міласэрнасцю ў сэрцы, жаданнем рабіць дабро таму, хто мае ў гэтым патрэбу, можа лічыць сябе валанцёрам”, – пераканана Галіна Станіславаўна.
Дарэчы, у Сусветны дзень валанцёраў дабравольным памочнікам чырванакрыжнай арганізацыі будуць урачыста ўручаны членскія білеты.
Таццяна ПАЛУБЯТКА. 

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Введите ответ (Fill in the blank)