Хроніка здарэнняў

 

На “кручку” ў махляроў

 

Камп’ютарная тэхніка і інтэрнэт надзейна ўвайшлі у наша жыццё. Аднак пры вялікіх выгодах, якія атрымалі карыстальнікі, праявіліся і праблемы. У прыватнасці, хітрыя схемы падману і выкрадання грошай з плацежных банкаўскіх картак. Нашы шчучынцы таксама часта трапляюць на закінутыя махлярамі “вудачкі”. Не так даўно, напрыклад, у адной маладой шчучынкі з карт-рахунка знікла 113 рублёў, у другой – 190. Двое іншых гараджан і жыхарка Астрыны пазбавіліся больш чым 200 рублёў. Віртуальныя ашуканцы пакрыўдзілі і членаў адной сям’і: з банкаўскіх карт гэтых людзей выкрадзена ажно 600 рублёў.

 

Звычайна крымінальныя маніпуляцыі з “чысткай” чужых карт-рахункаў ажыццяўляюць “спецыялісты”, якія знаходзяцца ў блізкім ці далёкім замежжы. Аднак ёсць і выпадкі, калі незаконныя віртуальныя метады апрабоўваюць і мясцовыя махляры. У прыватнасці, падманным шляхам дзейнічала жыхарка Гродна, якая на сайце “Куфар” пад выглядам продажу манікюрнага набору завалодала грашыма маладзіцы з Тапілішак.

 

Даўмеліся…

 

Раённы аддзел Следчага камітэта завёў крымінальную справу на чатырох землякоў -- работніка сельгаспрадпрыемства, двух студэнтаў і непрацуючага, якія праз акно з неахоўваемага будынка былой сельскай школы ўчынілі крадзеж больш чым 130 чугунных секцый ацяпляльных батарэй. Неабдуманымі дзеяннямі маладыя людзі нанеслі страты на суму больш за 2000 рублёў, а галоўнае – нашкодзілі самі сабе.

 

Пачуцці падвялі

 

Малады шчучынец стаў фігурантам крымінальнай справы пасля таго, як, знаходзячыся ў гасцях, уступіў у палавую сувязь з непаўналетняй дзяўчынай. Раней хлопец праблем з законам не меў.

 

Адным заходам

 

Справа была ў Шайбаках. Вырваўшы прабой з дзвярэй, невядомы зламыснік прабраўся ў дом, які належыць на правах спадчыны жыхару іншага населенага пункта, і вынес бензапілу. Такім жа чынам ён атрымаў доступ у гаспадарчую пабудову: адсюль прыхапіў прыстасаванне для рыхлення бульбы.

 

Іншы зламыснік, асоба якога таксама высвятляецца, «абследаваў» нежылую, пакінутую ў спадчыну сядзібу ў г.п. Астрына. З незамкнёнага гаража знікла садовая тачка.

 

Ужо вядома асоба таго, хто «выпіў і закусіў» – украў алкагольныя напіткі і прадукты з дома ў аграгарадку Гурнофель. Гэта жыхар суседняй вёскі, непрацуючы, неаднаразова судзімы.

 

Кропавая справа

 

Сяльчанка-пенсіянерка і жыхарка Гродна падазраюцца ў тым, што з поля паблізу вёскі Старынкі яны спрабавалі ўчыніць крадзеж… кропу. Давесці да канца задуманае не змаглі, але шкоду нанеслі – ажно на 160 рублёў. Па факце заведзена крымінальная справа.

 

Таццяна ВІТАЛЬЕВА.

 
Подписывайтесь на нас в Яндекс.Дзен, Telegram и Viber!