Прадстаўнікі сферы спорту і тырызму Шчучынскага раёна падвялі вынікі работы за мінулы год

Вынікі работы за мінулы год і асноўныя кірункі развіцця спартыўнай і турыстычнай сферы нашага раёна абмеркавалі прадстаўнікі спартыўнай грамадскасці падчас сходу, які прайшоў у Палацы творчасці дзяцей і моладзі. У мерапрыемстве ўзялі ўдзел загадчык сектара спорту і турызму Шчучынскага райвыканкама Дзмітрый Кірылаў, прафсаюзны лідар аграрыяў Шчучыншчыны Генрых Юрэвіч і старшыня раённага савета ветэранаў Святлана Малюгіна.

Летась Шчучыншчына пацвердзіла званне аднаго з найбольш спартыўных раёнаў Гродзенскай вобласці. Як адзначыў у сваім дакладзе Дзмітрый Кірылаў, каманды з нашага раёна дасягнулі поспехаў у гульнявых відах спорту як на абласным, так і рэспубліканскім узроўні.

У 2024 годзе шчучынцы сталі чэмпіёнамі і ўладальнікамі Кубка Гродзенскай вобласці па футболе. Залатыя медалі абласнога чэмпіянату па міні-футболе таксама заваявала наша каманда. Выдатны вынік паказалі нашы гандбалісты, якія летась мелі перамогу ў чэмпіянаце вобласці. Акрамя таго, наш раён працягвае заставацца адным з найважнейшых рэгіёнаў краіны ў пляжным футболе. Шчучынскі пляжны стадыён прыгажун штогод прымае важныя гульні рэспубліканскага першынства, прывабліваючы заўзятараў з розных куткоў Беларусі. Да таго ж шчучынцы годна прадстаўляюць наш раён на гэтых спаборніцтвах. Летась нашы пляжнікі заваявалі бронзу рэспубліканскіх спаборніцтваў.

Актыўна развіваецца спорт і ўнутры нашага раёна. У 2024 годзе на Шчучыншчыне было праведзена 78 фізкультурна-аздараўленчых мерапрыемстваў, у якіх узялі ўдзел 6902 чалавекі.

Летась 222 выхаванцаў спецыялізаваных спартыўных устаноў Шчучынскага раёна павысілі сваё спартыўнае майстэрства да ўзроўню другога і трэцяга юнацкіх разрадаў, 6 спартсменаў павысілі майстэрства да ўзроўню першага разраду і кандыдата ў майстры спорту.

Добрых вынікаў дасягнулі выхаванцы Шчучынскай ДЮСШ, якія ў 2024 годзе бралі ўдзел ва ўсіх афіцыйных абласных спаборніцтвах, а таксама ў рэспубліканскіх спаборніцтвах і турнірах у складзе зборных каманд вобласці, дзе станавіліся пераможцамі і прызёрамі як у камандным, так і у асабістым заліку.

У мінулым годзе ў вышэйшае звяно падрыхтоўкі былі перададзены 3 спартсмены-выхаванцы ДЮСШ. У спісачны склад нацыянальных зборных каманд Рэспублікі Беларусь летась уключана 5 нашых выхаванцаў.

Да таго ж актыўна ідзе мадэрнізацыя спартыўнай інфраструктуры нашага раёна. У 2024 годзе вяліся работы па мадэрнізацыі футбольнага поля і лёгкаатлетычнага ядра шчучынскага стадыёна “Алімп”. Гэтыя работы працягнуцца і ў 2025 годзе.

Таксама прысутныя абмеркавалі магчымасці арганізацыі ў нашым раёне новых спартыўных мерапрыемстваў, у прыватнасці для людзей пажылога ўзросту.

Што тычыцца турызму, то яго развіццё на тэрыторыі нашага раёна ажыццяўляецца ў рамках дзяржаўнай праграмы “Беларусь гасцінная”. Мэтай праграмы з’яўляецца фармаванне і развіццё сучаснага канкурэнтаздольнага турыстычнага комплексу, які ў перспектыве будзе рабіць годны ўнёсак у нацыянальную эканоміку.

Напрыканцы мерапрыемства граматамі і падарункамі былі адзначаны людзі, якія летась зрабілі значны ўнёсак у развіццё спорту і турызму на Шчучыншчыне. Асобна былі адзначаны прадстаўнікі прадпрыемстваў АПК нашага раёна, якія дасягнулі значных поспехаў у спартыўнай сферы.

Алег ШЫШЛОЎСКІ.

Фота аўтара.