Пладаводства з інавацыйным падыходам. У Шчучыне прайшоў абласны семінар па развіцці галіны пладаводства Гродзенскай вобласці ў 2023 годзе
Вырашэнне актуальных праблем садаводства і сучасныя падыходы ў вырошчванні пладова-ягадных культур. Менавіта такія пытанні цікавілі ўдзельнікаў семінара “Праблемныя пытанні галіны пладаводства Гродзенскай вобласці ў 2023 годзе і шляхі іх вырашэння”.
Мерапрыемства прайшло ў Шчучыне на базе Гродзенскага занальнага інстытута раслінаводства НАН Беларусі і сабрала кіраўнікоў, а таксама аграномаў-садаводаў з 27 спецыялізаваных пладаводчых прадпрыемстваў нашай вобласці. Таксама ў рабоце семінара ўзяў удзел старшыня камітэта па сельскай гаспадарцы і харчаванні Гродзенскага аблвыканкама Дзмітрый Кадргулаў.
Падчас семінара спікеры выступілі з актуальнымі і важнымі дакладамі. Так, вядучы спецыяліст па пладаводстве Гродзенскага абласнога аграпрамысловага саюза Дзмітрый Лях закрануў тэму догляду шматгадовых пладова-ягадных дрэў, звярнуў увагу на праблемы галіны і разам з прадстаўнікамі прадпрыемстваў прааналізаваў сітуацыю ў вобласці. Вялікая ўвага падчас даклада надавалася ахове дрэў ад шкоднікаў і інфекцый.
Прадстаўнікі Гродзенскага дзяржаўнага аграрнага ўніверсітэта закранулі навуковы бок садаводства і падзяліліся вынікамі прымянення сваіх напрацовак на практыцы.
Пра эфектыўнасць работы ў гэтым накірунку расказаў начальнік групы прамысловага саду Гродзенскага занальнага інстытута раслінаводства НАН Беларусі Станіслаў Несцер:
– Наш аддзел садаводства шматпрофільны. Летась інстытут набыў каля 100 гектараў саду і сховішча для садавіны на 600 тон. У мінулым годзе гаспадаркай было сабрана каля 2 тысяч тон яблыкаў пры сярэдняй ураджайнасці 35 тон з гектара з улікам новых земляў. Кожны год у нас закладваецца прыблізна 5 гектараў маладога саду, усяго мы вырошчваем каля 50 гатункаў.
Пасля тэарэтычнай часткі ўдзельнікі семінара перайшлі да практыкі і наведалі сад, а таксама пладасховішча занальнага інстытута. Станіслаў Несцер правёў цікавую экскурсію па гэтых аб’ектах і падзяліўся з прысутнымі методыкамі, якія дапамагаюць павялічыць эфектыўнасць пладаводства.
Вынікі семінара падвёў Дзмітрый Кадргулаў:
– Хачу сказаць дзякуй супрацоўнікам Гродзенскага занальнага інстытута раслінаводства за пазнавальную лекцыю і цікавую экскурсію. Па выніках семінара будзе складзены пратакол. Спадзяваюся, што ўсе заўвагі, выказаныя сёння, ў хуткім часе вырашацца. Пастарайцеся забяспечыць сябе неабходнай колькасцю сродкаў аховы, каб да канца давесці распачатую працу і атрымаць годны ўраджай.
Алег ШЫШЛОЎСКІ.
Фота аўтара.