“Скураны мяч” вызначыў пераможцаў

У Шчучыне прайшлі раённыя спаборніцтвы па міні-футболе “Скураны мяч” сярод рабят 2003-2004 гадоў нараджэння. За званне мацнейшых футбалістаў Шчучыншчыны змагаліся 17 каманд, якія былі падзелены на дзве падгрупы.

Гульні ладзіліся адначасова на дзвюх спартыўных пляцоўках: на гарадскім стадыёне “Алімп” і міні-футбольнай пляцоўцы са штучным пакрыццём па вуліцы Авіятараў. 
У “гарадской” падгрупе мацнейшай стала футбольная дружына з Ражанкі, якая перамагла ўсіх сваіх сапернікаў і набрала 9 ачкоў. Другое і трэцяе месцы занялі адпаведна каманды СШ №1 і СШ №2 г. Шчучына. 
Сярод сельскіх каманд не было роўных юным футбалістам з Орлі. Між іншым, гэта адзіная зборная, у складзе якой гулялі дзяўчынкі.
– Мой брат Аляксей – нападаючы орлеўскай хакейнай дружыны, аднак футбол ён любіць не менш, – зазначае Ганна Рымко. – Яго захапленне перадалося і мне. Калі трэнер Уладзімір Уладзіміравіч Хелскі прапанаваў прыняць удзел у футбольным турніры “Скураны мяч”, не раздумваючы згадзілася. Такой магчымасцю скарысталася і мая сяброўка Ганна Карповіч. Мы выкладваліся на полі па поўнай, каб заваяваць перамогу.


Прызёры спаборніцтваў былі ўзнагароджаны кубкамі, дыпломамі і медалямі. Першы сакратар раённага камітэта “БРСМ” Алена Славаміраўна Богдзель уручыла юным футбалістам салодкія падарункі. 
Падчас матчаў трэнеры ўважліва сачылі за гульнёй каманд і вылучалі найбольш перспектыўных ігракоў. Усе яны ўвойдуць у склад зборнай каманды раёна і будуць абараняць гонар Шчучыншчыны на абласным этапе спаборніцтваў “Скураны мяч”.
Аляксандр КАСПЯРЧУК. Фота аўтара.

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Fill in the blank.