Дзе тэхніка як след абслужана, там і кармы будуць нарыхтаваны

Наколькі якасна абслужаны кормаўборачныя камбайны? У якім стане знаходзяцца сянажныя і сіласныя траншэі? Ці наведзены належны парадак у гаражах і складскіх памяшканнях? Гэтым пытанням надавалася асаблівая ўвага падчас раённага агляду тэхнікі, арганізаванага начальнікам упраўлення сельскай гаспадаркі і харчавання райвыканкама Генадзем Баляслававічам Хомічам сумесна са спецыялістамі райсельгасхарчу і іншымі зацікаў­ленымі службамі.

У мехмайстэрні “Бярозаўцы” ААТ “Агра-ГЖС”, куды заехалі ўдзельнікі рэйду, панавалі чысціня і парадак. Магутныя камбайны і трактары тут былі выстраены ў рад. Тэхніка выглядала дагледжанай, як і касілкі, граблі, іншыя навясныя агрэгаты, што размясціліся побач.
– Сёлета нам прадстаіць абкасіць 2500 гектараў траў, убраць кукурузу на сілас на плошчы 900 га, – гаворыць дырэктар ААТ “Агра-ГЖС” Віктар Генрыхавіч Паўлюкевіч. – Для гэтага задзейнічаем 4 кормаўборачныя камбайны і 7 касілак. Уся тэхніка адрамантавана і гатова да выхаду ў поле. Паліва таксама хапае. 


Выдатна падрыхтаваліся да пачатку кормаўборачнай кампаніі і ў СВУ “Пратасаўшчына”, філіяле “Жалудоцкі агракомплекс”, ААТ “Дэмбрава” і “Васілішкі”, дзе тэхніка таксама прыведзена ў “баявую” гатоўнасць, а таксама ўкамплектавана вогнетушыцелямі і медыцынскімі аптэчкамі. 

А вось аграрыям ААТ “Шчучынаграпрадукт” не ўдалося ў тэрмін адрамантаваць камбайн і некалькі грабляў. Пэўныя недахопы былі выяўлены таксама ў ААТ “Орля” і саўгасе “Вялікае Мажэйкава”. Нездавальняючымі тэмпамі ідзе падрыхтоўка да кормаўборачнай кампаніі і ў ААТ “Першамайск-агра”. 
– Калі мы не нарыхтуем у поўнай меры якасных кармоў, то пачнём мінусаваць у вытворчасці малака і мяса, а гэта недапушчальна! – падкрэсліў начальнік райсельгасхарчу Г.Б. Хоміч. – Усе недахопы, выяўленыя падчас раённага агляду тэхнікі, павінны быць аператыўна выпраўлены. Калі камбайны і трактары будуць як след адрамантаваны і абслужаны, то і экзамен у полі вытрымаем дастойна.
Падводзячы вынікі агляду, Генадзій Баляслававіч падкрэсліў, што неабходна перагледзець норму расходу паліва ў гаспадарках з мэтай больш рацыянальнага яго выкарыстання. Таксама ён звярнуў увагу кіраўнікоў сельгаспрадпрыемстваў на даведзеныя дзяржавай планы па здачы металалому, зношаных колаў, адпрацаванага масла і макулатуры, якія неабходна абавязкова выканаць.
Аляксандр КАСПЯРЧУК.
Фота аўтара.

Голосов пока нет

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Введите ответ (Fill in the blank)