Як апрануцца модна і танна? Нашы парады дапамогуць вам сэканоміць грошы, час і нервы
Як вядома, самы лепшы экспромт – экспромт падрыхтаваны. Гэта датычыцца розных праяў дзейнасці чалавека, у тым ліку і шопінгу. Калі, вандруючы па вялікаму гандлёваму цэнтру, вы неспадзявана ўбачылі прыгожую рэч, якую вам вельмі хочацца набыць, 90 %, што вы яе набудзеце. Але навошта? У гэты момант вы не можаце адказаць на гэтае пытанне, таму што купляеце не рэч, а эмоцыю, за якую плаціце рэальныя грошы. Вярнуўшыся дамоў, хутчэй за ўсё вы ўбачыце, што гэтая рэч вам зусім не патрэбна, і ваша ўзнёсласць зменіцца расчараваннем. Настрою няма і грошай таксама няма! А ўсё таму, што шопінг – справа сур’ёзная і падыходзіць да яе трэба не эмацыянальна, а асэнсавана. І тут ёсць свае правілы.
Правілы моднага шопінгу:
- Перад тым, як адправіцца па пакупкі, трэба абавязкова перагледзець і прааналізаваць свой гардэроб, каб высветліць, якога адзення ў вас не хапае і ад чаго трэба бавязкова пазбавіцца.
- Складзіце шопінг-ліст. Ён дапаможа вам набыць тое, што патрэбна ў першую чаргу.
- Адзенне лепш за ўсё набываць камплектамі, падбіраючы адпаведныя аксесуары. Калі ў вашым гардэробе ёсць, напрыклад, спадніца, да якой трэба падабраць блузу, то спадніцу трэба абавязкова ўзяць з сабой.
- Загадзя вызначыце, якую колькасць грошай вы можаце выдаткаваць са свайго бюджэту на абноўкі. Лепш за ўсё разлічвацца наяўнымі грашыма, а не банкаўскай карткай.
- Хадзіць на шопінг раім аднаму або з прафесійным стылістам. Густ і эмоцыі вашых сваякоў у гэтай справе будуць залішнімі і не паспрыяюць эфектыўнасці шопінгу.
- Каб вас лічылі модніцай, найлепшы варыянт мець базавы гардэроб і напачатку новага сезона дадаваць да базы дзве-тры трэндавыя рэчы. Менавіта такі падыход дапаможа вам і грошы сэканоміць, і ад часу не адстаць.
Модныя трэнды восені 2021
Надыходзячай восенню асноўны акцэнт у адзенні на лаканічнасць, утульнасць і камфорт. Зыходзячы з гэтага, прапануем вам некалькі трэндаў, пры дапамозе якіх можна асвяжыць ваш гардэроб.
1. Паліто-аверсайз. Калі з надыходам восені вам хочацца схавацца ад рэальнасці, то гэты прадмет – тое, што трэба. Выбраць мадэль не складана. У трэндзе – понча, кейпы, сцёганыя курткі-коўдры, паліто са штучнага футра.
2. Камбінезоны. Яшчэ адзін восеньскі трэнд для аматараў камфортнай вопраткі. Цэльны і лаканічны прадмет гардэроба дапаможа візуальна павялічыць рост і звузіць аб'ёмы фігуры.
3. Адзенне з дэніму. Не, не проста адзін джынсавы прадмет у вашым вобразе, а лук у стылі “тотал дэнім”, дэвіз якога “джынсу многа не бывае!”
4. Вязанае адзенне. Асаблівай папулярнасцю ў гэтым восеньскім сезоне будуць карыстацца вязаныя рэчы з мяккай і цёплай шэрсці нібы "ад бабулі". Сукенкі, спадніцы розных колераў і танальнасці. Асаблівую папулярнасць набываюць прасторныя камізэлькі, якія будзем насіць паверх кашулі ў спалучэнні з нагавіцамі.
5. Яркая прынтавая вопратка. Калі восень – гэта пара года, якая навявае смутак, яркае адзенне дапаможа справіцца з гэтай праблемай і, безумоўна, палепшыць настрой.
6. Абутак. Аднавіць ваш арсенал у гэтым сезоне дапамогуць футравыя мюлі, лоферы на грубай падэшве і мадэлі з геаметрычным малюнкам і фірменнымі прынтамі. Калі вы аматар класічнага абутку, то ў трэндзе боты з галянішчам “гармонік”, боты-трубы з квадратным носам.
7. І – не забывайцеся на маскі! Гэты аксесуар, які ўжо больш за год з’яўляецца неад’емнай часткай нашага гардэроба, паспеў прайсці сваю модную трансфармацыю і стаць сапраўдным акцэнтам у вобразах модніц усяго свету.