Традыцыйная сустрэча маладых спецыялістаў са старшынёй райвыканкама адбылася сёння ў Шчучыне
Традыцыйная сустрэча маладых спецыялістаў Шчучыншчыны са старшынёй райвыканкама Аляксеем Садоўскім адбылася сёння ў Палацы творчасці дзяцей і моладзі. Шчырая размова на актуальныя тэмы з маладымі настаўнікамі, медыкамі, аграрыямі, міліцыянерамі і прадстаўнікамі іншых прафесій прайшла ў перадсвяточнай атмасферы.
Таксама ў мерапрыемстве ўзялі ўдзел і іншыя прадстаўнікі кіраўніцтва раёна – намеснік старшыні райвыканкама, старшыня Шчучынскага раённага аддзялення Гродзенскай вобласці Беларускай партыі "Белая Русь" Таццяна Цюсіна і начальнік аддзела адукацыі райвыканкама Павел Тарчынскі. Мадэратарам сустрэчы выступіў першы сакратар Шчучынскай раённай арганізацыі БРСМ Дзмітрый Чывіль.
Перад пачаткам мерапрыемства прысутныя мелі магчымасць паглядзець фільм пра дасягненні, якімі славіцца Шчучынскі раён у розных сферах дзейнасці.
Сама сустрэча прайшла ў фармаце адкрытага мікрафону, ва ўсіх прысутных была магчымасць задаць галаве раёна сваё пытанне, выступіць з прапановай, альбо падзяліцца ініцыятывай.
Моладзь Шчучыншчыны цікавілася планамі развіцця інфраструктуры, адкрыцця новых спартыўных і забаўляльных аб’ектаў у нашым раёне. Шэраг пытанняў тычыўся асобы Аляксея Валянцінавіча. Так, маладыя спецыялісты пыталіся пра першае месца працы кіраўніка раёна, пра адносіны са старэйшымі калегамі і прысутнасць у сацыяльныя сетках.
Свае пытанні задаў і Аляксей Садоўскі. Ён пацікавіўся, як шчучынская моладзь бавіць вольны час, што прывяло таго ці іншага маладога спецыяліста ў прафесію і што можа зрабіць улада, каб палепшыць жыццё моладзі нашага раёна.
Актыўна падчас мерапрыемства абмяркоўвалася тэма свядомага выбару прафесіі, таксама прысутныя пагутарылі пра актуальныя моладзевыя трэнды.
Напрыканцы сустрэчы моладзь прэзентавала Аляксею Садоўскаму падарунак – выкананы з дрэва герб Шчучына.
– Дзякуй, што ўзялі ўдзел у сённяшняй сустрэчы, – звярнуўся да маладых спецыялістаў Аляксей Садоўскі. – Калі маеце жаданне, то рухайцеся па кар’ернай лесвіцы ўпэўненай паходкай. Паверце, у вас усё атрымаецца. Але разумейце, што кар’ера – гэта сур’ёзная праца. Чым вышэй пасада, тым больш працы і адказнасці на ёй. Таму стаўце мэты рацыянальна, заўсёды іх дасягайце і смела ідзіце па жыцці.
Алег ШЫШЛОЎСКІ.
Фота аўтара.