“Падлеткі, якія хочуць летам зарабіць, павінны мець магчымасць працаўладкавацца”

Такую задачу паставіла кіраўніцтва раёна падчас пасяджэння штаба студэнцкіх атрадаў і маладзёжнай занятасці, якое прайшло пад кіраўніцтвам намесніка старшыні райвыканкама А.І. Тодрыка. Пры гэтым работадаўцы павінны разумець сваю важную ролю: ад таго, якія ўражанні ад першай работы вынесе малады чалавек, у многім будзе залежаць яго светапогляд, далейшае імкненне працаваць і сумленна зарабляць.

-- А значыць, важна добразычліва сустрэць навічка на вытворчасці, назначыць настаўніка, дапамагчы адаптавацца і даць магчымасць нармальна зарабіць. Зарплаты падлеткаў, як і пытанні аховы працы, падчас летняй занятасці будуць на асаблівым кантролі, -- падкрэсліў Анатолій Іванавіч Тодрык.

Першы сакратар райкама ГА “БРСМ” Вікторыя Куцэйка звярнулася да вопыту мінулага працоўнага семестра, калі ў складзе студэнцкіх атрадаў на Шчучыншчыне паспяхова працавалі больш за 400 юнакоў і дзяўчат. Сярэдні заробак склаў тады 231 рубель. Добрыя ўмовы і высокую арганізацыю працоўных працэсаў для маладых людзей летась стварылі ў ААТ “Дэмбрава” і “Васілішкі”, СВУ “Пратасаўшчына”, у РУП ЖКГ, на прадпрыемстве “Клубніка Плантс” і іншых. Сёлета з арганізацыямі і прадпрыемствамі Шчучыншчыны заключана 20 дагавораў на працаўладкаванне 312 непаўналетніх. І гэта работа працягваецца. У школах раёна старшакласнікаў інфармуюць, што пачынаючы з 14 год ёсць магчымасць папрацаваць на канікулах і зарабіць уласныя грошы.

--  Безумоўна, наша моладзь хоча сябе праявіць і пра сябе заявіць. Творчыя схільнасці можна рэалізаваць у тым ліку праз супрацоўніцтва са сродкамі масавай інфармацыі, -- прапанавала намеснік старшыні райвыканкама Алена Васільеўна Пасюта. – Хочацца, каб аўтарскі актыў нашай раённай газеты папоўнілі школьнікі-юнкоры і расказалі ў сваіх публікацыях аб тым, як ідзе рэалізацыя новых праектаў і ідэй на месцах. Для актывістаў БРСМ прыярытэтным напрамкам можа стаць работа ў сацыяльных сетках, дзе таксама надзвычай важна папулярызаваць летнюю занятасць. Яшчэ адна ніша – справай адгукацца на звароты грамадзян. Моладзь можа аператыўна прыйсці на дапамогу пажылым людзям у вырашэнні бытавых пытанняў, падставіць плячо ў правядзенні добраўпарадкавання, азеляненні двароў і г.д.

Прастор для цікавых ініцыятыў вялікі. Было б жаданне! І калі каардынаваць работу студэнцкіх атрадаў упаўнаважаны райкам БРСМ, то знайсці справу па душы тым, хто жадае працаўладкавацца індывідуальна, павінна служба занятасці, шырока інфармуючы аб вакансіях.

Таццяна СТУПАКЕВІЧ.

Фото Анны Каспер.