Летні адпачынак плячом да пляча. Урачыстае закрыццё змены прайшло ў праваслаўным ваенна-патрыятычным лагеры “Дружына”
Урачыстая сустрэча, прымеркаваная да завяршэння 16-х летніх збораў выхаванцаў праваслаўнага ваенна-патрыятычнага клуба “Дружына”, прайшла на гэтым тыдні.
На сустрэчу з выхаванцамі лагера прыехалі памочнік Прэзідэнта Рэспублікі Беларусь – інспектар па Гродзенскай вобласці Юрый Караеў, начальнік аддзела прафілактыкі ўпраўлення аховы правапарадку і прафілактыкі грамадскай бяспекі УУС Гродзенскага аблвыканкама Аляксандр Гележа, старшыня Шчучынскага райвыканкама Аляксей Садоўскі, намеснік старшыні райвыканкама Таццяна Цюсіна і начальнік аддзела ўнутраных спраў Шчучынскага райвыканкама Аляксандр Мельнікаў.
Вось ужо 16 гадоў выхаванцы праваслаўнага ваенна-патрыятычнага клуба “Дружына” адпраўляюцца на летнія лагерныя зборы. Лагер гэты асаблівы. Тут хлопцы і дзяўчаты не проста адпачываюць, але і паляпшаюць сваю фізічную форму, узмацняюць сваю духоўнасць. Знаходзіцца лагер у жывапіснай мясціне – на высокім беразе ракі Котра.
У “Дружыны” ёсць свой духоўнік, ужо 13 гадоў ім з’яўляецца дабрачынны Шчучынскай царкоўнай акругі іерэй Аляксандр Пасцерняк. Ён падрабязней расказаў пра важнасць духоўнага складніка ў патрыятычным выхаванні моладзі:
– Кожная раніца ў лагеры пачынаецца з малітвы і кожны дзень завяршаецца ёю. Святар нясе дзяжурства ў лагеры кожны дзень. Таксама ў лагеры была адслужана літургія, падчас якой мы маліліся за мір у нашай краіне, за дзяцей, за клуб. Вельмі важна, калі ў чалавеку сумяшчаецца духоўнае і фізічнае. У такім выпадку атрымліваецца выхаваць сапраўднага патрыёта, чалавека, які любіць Радзіму, сям’ю і сяброў. Умовы лагера добра падыходзяць для таго, каб адпачыць і ўдасканаліць сваю фізічную і духоўную форму.
Жыццё ў палявых умовах, вывучэнне вайсковай і рэлігійнай навукі, здача нарматываў, праходжанне паласы перашкод, вячэрнія і ранішнія малітвы – усё гэта толькі малая частка задач выхаванцаў ваенна-патрыятычнага лагера. На працягу дзевяці дзён дружыннікі, не зважаючы на спёку і лівень, неслі сваю службу, жылі па раскладзе і стаялі ў вартах. На прыём ежы хадзілі за паўтара кіламетра ў дзіцячы лагер “Касмадром”. Шлях туды і назад складае тры кіламетры, і так тры разы на дзень.
Высокую ацэнку падрыхтоўцы “дружыннікаў” даў Юрый Караеў, ён заўважыў, што таварыства і сяброўства, якое набываецца ў палявых умовах, захоўваецца надоўга:
– Я быў вельмі рады, калі даведаўся, што юнакі і дзяўчаты Шчучынскага раёна праводзяць лета ў такім патрыятычным, духоўным, праваслаўным лагеры. Незвычайная з’ява, бо тут ёсць як вайсковая, так і духоўная падрыхтоўка. Немагчыма выхаваць добрага патрыёта аднымі фізічнымі практыкаваннямі, яшчэ трэба нешта ўкласці ў душу і сэрца. Праз строй, праз узаемадзеянне і мерапрыемствы вы выхоўваеце свой характар. Няважна, ці пойдзеце вы потым у сілавыя структуры, вядома, нам бы хацелася, каб вы пайшлі абараняць Радзіму. Але галоўнае, што вы заўсёды будзеце памятаць, – сваё таварыства, якое, без перабольшвання, ўжо можна назваць вайсковым.
Як адзначае кіраўнік клуба “Дружына” маёр міліцыі Павел Найда, палявыя зборы – гэта выніковая дэманстрацыя навыкаў і ведаў. “Дружына” не абмяжоўваецца летнім лагерам – гэта своеасаблівы лад жыцця, якога выхаванцы клуба прытрымліваюцца на працягу ўсяго года.
– Тыя выпрабаванні, якія вы прайшлі падчас лагернай змены, заслугоўваюць павагі, – адзначыў у сваім звароце да выхаванцаў клуба начальнік РАУС Аляксандр Мельнікаў. – Мы назіралі за мерапрыемствамі, якія праходзілі ў лагеры. Я перакананы, што кожны з вас зрабіў пэўныя высновы для сябе. А тыя, хто браў удзел у рабоце лагера першы год, з задавальненнем працягнуць удзел у наступным годзе. Паважаныя сябры, хачу вас павіншаваць, што вы ўсе з гонарам прайшлі выпрабаванні і таму вартыя павагі не толькі сярод вашых аднагодкаў, але і сярод дарослых людзей.
Падзякі і граматы ў той дзень былі ўручаны лепшым дружыннікам. Таксама ўсе выхаванцы атрымалі сімвалічныя падарункі. Навабранцам былі ўручаны імянныя жэтоны, а выпускнікам клуба – памятныя знакі.
Галоўнай інтрыгай стала ўручэнне чорных берэтаў. Права насіць гэты асаблівы атрыбут вайсковай формы мае не кожны выхаванец патрыятычнага клуба, бо гэтае права трэба заслужыць. Берэт выдаецца самым спрытным, мужным і патрыятычным дружыннікам.
Пасля афіцыйнай часткі мерапрыемства для шаноўных гасцей правялі экскурсію па лагеры, – пазнаёмілі з умовамі пражывання выхаванцаў клуба і іх побытам. Завяршылася сустрэча нефармальнай гутаркай і палявым абедам. Разам удзельнікі абмеркавалі пытанні патрыятычнага выхавання моладзі і работу клуба “Дружына”. Юрый Караеў расказаў моладзі цікавыя гісторыі са сваёй службы і жыцця.
Алег ШЫШЛОЎСКІ.
Фота аўтара.
