Хроніка здарэнняў

Спакуса для злодзея

 

 Маладая шчучынка неабачліва пакінула свой кашалёк у таварнай карзіне на стэлажы аднаго з магазінаў горада. Рэч знікла хутка. Як кажуць, плакалі грошыкі – 130 рублёў і некалькі долараў ЗША. Раённы аддзел Следчага камітэта тут жа завёў па факце крадзяжу крымінальную справу. І асоба таго, хто паквапіўся на чужое, ужо ўстаноўлена. Як высветлілася, не здолела справіцца са спакусай забраць чужое жанчына-пенсіянерка. Рублі і долары давялося вярнуць. Раней праблем з законам гэта жанчына не мела.

 

У пошуках святла. І не толькі

 

Невядомы пакуль зламыснік дастаў акно ў нежылым доме, што ў вёсцы Канстанцінаўка, і вынес адтуль свяцільню “Чэмпіён” за 18 рублёў. Хто так настойліва імкнуўся з цемры да святла, цяпер высвятляюць праваахоўнікі.

Таксама вядзецца вышук і зламыснікаў, якія “гаспадарылі” ў доме ў вёсцы Міцары, які на праве спадчыны належыць жыхарцы абласнога цэнтра. Няпрошаных “гасцей” цікавілі электраправодка і падаўжальнік. А вось асобы марадзёраў, якія “пачысцілі” гаспадарчую пабудову на апусцелай сядзібе ў Клімаўшчыне, сышчыкі ўжо ўстанавілі. Камплект проваду да зварачнага апарата і электрашнуры да бытавой тэхнікі сцібрылі раней неаднаразова судзімыя шчучынец і жыхар іншай вобласці. Дарэчы, гэтыя грамадзяне падазраюцца і ў зладзейскіх набегах на іншыя апусцелыя дамы.

 

Свой бровар?

 

У гаспадарчай пабудове на сядзібе жыхара Астрыны супрацоўнікі міліцыі знайшлі 420 літраў самагоннай брагі і апарат для перагонкі яе ў вядомы напой з градусамі. Вадкасць са спецыфічным пахам знішчана, у адносінах да пенсіянера праводзіцца праверка.

 

Работнічкі…

 

Супрацоўнікі АДАІ ў аграгарадку Балічы затрымалі механізатара, які знаходзіўся ў стане алкагольнага ап’янення і кіраваў трактарам. Нецвярозай была і жанчына-палявод, якую міліцыянеры сустрэлі на тэрыторыі мехмайстэрні ў Новым Двары.

 

Таццяна ВІТАЛЬЕВА.

 
Подписывайтесь на нас в Яндекс.Дзен, Telegram и Viber!