Пытанні сацыяльна-эканамічнага развіцця раёна ў першым квартале бягучага года абмеркавалі на чарговым пасяджэнні райвыканкама

Выкананне ключавых паказчыкаў, прыцягненне інвестыцый у рэгіён і іншыя пытанні сацыяльна-эканамічнага развіцця раёна за першы квартал бягучага года абмеркавалі на чарговым пасяджэнні райвыканкама.

 У прыярытэце інвестыцыі і зарплата

Выступаючы з дакладам, намеснік старшыні райвыканкама Міхаіл Сушчэўскі адзначыў, што па выніках першага квартала ў раёне выкананы тры даведзеныя ключавыя паказчыкі. Так, сукупныя паступленні даходаў у бюджэт Шчучынскага раёна склалі 118% пры прагнозе на год 107,9%. Інвестыцыі ў асноўны капітал склалі 126,8% пры даведзеным заданні 105,5%. Дзякуючы стабільнай рабоце працоўных калектываў раёна тэмп росту намінальнай сярэднямесячнай заработнай платы склаў 119,1% пры заданні 112,7%.

У першым квартале вытворчасць прамысловай прадукцыі ўзрасла да адпаведнага перыяду мінулага года на 8%. Індэкс фізічнага аб'ёму вытворчасці прамысловай прадукцыі склаў 106,3% пры заданні 100,8%. Абарот знешняга гандлю таварамі за студзень-сакавік склаў 25,3 млн долараў ЗША, што на 6,9% ніжэй за ўзровень мінулага года. Забяспечана ўстойлівае станоўчае сальда знешняга гандлю ў суме 6,1 млн долараў ЗША.

– Планам развіцця Шчучынскага раёна на 2023 год прадугледжана рэалізацыя 26 інвестыцыйных праектаў. На развіццё эканомікі і сацыяльнай сферы ў студзені-сакавіку накіравана інвестыцый у асноўны капітал на суму больш за 27 млн рублёў, – падкрэсліў Міхаіл Вітольдавіч. – Прыцягнута 648,2 тыс. долараў ЗША прамых замежных інвестыцый на чыстай аснове. Аб'ём падрадных работ, выкананых будаўнічымі арганізацыямі раёна, склаў 6,9 млн рублёў, або 145,2% да аналагічнага перыяду мінулага года. Уведзена ў эксплуатацыю 1874 квадратныя метры жылля, што складае 18,7% гадавога задання.

Міхаіл Вітольдавіч таксама звярнуў увагу, што не ўсе намечаныя планы ўдалося ажыццявіць. Не забяспечана выкананне рознічнага гандлю, груза- і пасажыраабароту.

 Развіваць жывёлагадоўлю – першарадная задача 

Першы намеснік старшыні – начальнік упраўлення сельскай гаспадаркі і харчавання райвыканкама Ігар Аверка праінфармаваў аб выніках работы сельскагаспадарчай галіны рэгіёна. Сельскагаспадарчымі арганізацыямі ў першым квартале выраблена прадукцыі на суму 72 млн рублёў. Тэмп росту вытворчасці валавой прадукцыі сельскай гаспадаркі склаў 98,4% пры даведзеным заданні 100,7%.

Валавая вытворчасць малака за тры месяцы  ў параўнанні з адпаведным перыядам мінулага года узрасла на 5,9% і склала 36,6 тыс. тон. Прадуктыўнасць дойнага статка ўзрасла на 102 кг. Ад адной каровы надоена 1923 кг малака. Звыш 2277 кг ад рагулі надаілі ў СВУ "Пратасаўшчына", самая нізкая прадуктыўнасць кароў у ААТ “Орля” (1440 кг). У сярэднім па раёне таварнасць малака павялічылася ў параўнанні з мінулым годам на 0,4% і склала 92,4%, – адзначыў Ігар Уладзіміравіч. –  Прадукцыя вырошчвання буйной рагатай жывёлы за студзень-сакавік бягучага года ў параўнанні з аналагічным перыядам мінулага года  склала 3,4 тыс. тон, або 101,6%.  Прадукцыя вырошчвання свіней – 4,2 тыс. тон, што складае 99,1% да плана.

Па выніках трох месяцаў прадпрыемствы аграпрамысловага комплексу раёна атрымалі выручку ад рэалізацыі прадукцыі на суму 94,5 млн рублёў, што вышэй за ўзровень мінулага года на 19,7 млн. Чысты прыбытак павялічыўся на 7,4 млн рублёў і склаў 11,6 млн рублёў.

У раёне завершана ў поўным аб'ёме сяўба збожжавых і зернебабовых культур, цукровых буракоў, кукурузы на сілас і пасадка бульбы. Плануецца атрымаць 160 тыс. тон зерня ў амбарнай вазе, насення рапсу – 20,7 тыс. тон, цукровых буракоў – 82,7 тыс. тон, 17,7 тыс. тон бульбы, нарыхтаваць 168 тыс. тон кармавых адзінак травяных кармоў.

У сваю чаргу старшыня райвыканкама Аляксей Садоўскі акцэнтаваў увагу на выкананні паказчыка вытворчасці валавой прадукцыі сельскай гаспадаркі, павелічэнні вытворчасці малака ў гаспадарках, павышэнні яго таварнасці і якасці, зніжэнні працэнта непрадукцыйнага выбыцця БРЖ, недастатковай рабоце сельгаспрадпрыемстваў па мэтавай падрыхтоўцы спецыялістаў. Адна з найважнейшых задач на бліжэйшы час – нарыхтоўка кармоў. У бліжэйшай перспектыве трэба надаць увагу перазалужэнню зямель.

Ацэньваючы вынікі сацыяльна-эканамічнага развіцця Шчучыншчыны ў першым квартале, Аляксей Валянцінавіч адзначыў, што, нягледзячы на ​​існуючыя цяжкасці, забяспечана выкананне важнейшых паказчыкаў сацыяльна-эканамічнага развіцця раёна: “Задачы вызначаны, і ўсе павінны разумець, што сёлета няма ніякіх падстаў для іх невыканання. Наступнае пасяджэнне райвыканкама па разглядзе гэтых пытанняў мы правядзем па выніках паўгоддзя. Будзе дадзена ацэнка рабоце кіраўнікоў суб'ектаў гаспадарання. Падкрэслю, што сумесныя намаганні мясцовай улады, кіраўнікоў арганізацый павінны быць засяроджаны на захаванні тэмпаў эканамічнага росту. Ад гэтага будзе залежаць стан спраў у працоўных калектывах і сем'ях работнікаў”.

Рашэннем райвыканкама дадзены канкрэтныя даручэнні па выкананні даведзеных паказчыкаў па выніках работы за першае паўгоддзе.

Сяргей КАСПЯРЧУК.

Фота Аляксандра КАСПЕРЧУКА.