Мір – наша галоўная каштоўнасць. Чарговы адзіны дзень інфармавання прайшоў у Шчучынскім раёне
19 снежня ў нашым раёне прайшоў адзіны дзень інфармавання. Прадстаўнік абласной інфармацыйнай групы – старшыня Гродзенскай абласной арганізацыі Беларускага прафсаюза работнікаў адукацыі і навукі Лела Шпак, а таксама раённая інфармацыйная група сустрэліся з працоўным калектывам Шчучынскай ЦРБ.
У склад раённай інфармацыйнай групы ўвайшлі начальнік упраўлення па працы, занятасці і сацыяльнай абароне райвыканкама Андрэй Навіцкі, намеснік начальніка Шчучынскага раённага аддзела Следчага камітэта Сяргей Пецкель, начальнік Шчучынскага РАНС Аляксандр Малюгін і дырэктар Шчучынскага РУП ЖКГ Юрый Гірдзь.
Чарговы дзень інфармавання быў прысвечаны тэме “Беларусь – краіна міру і згоды”. Першай з дакладам выступіла Лела Шпак, яна расказала аб ініцыятывах і прынцыпах, на якіх у Беларусі трымаецца міжнацыянальная і міжканфесійная згода.
– Гімн нашай краіны пачынаецца са слоў “Мы, беларусы – мірныя людзі”, і ў гэтай фразе закладзена тая палітыка, якая спакон вякоў праводзіцца ў Беларусі. Вядома, ні для каго не сакрэт, што гісторыя нашай краіны была нялёгкай. На долю нашых продкаў выпала шмат ваенных іспытаў. Гэтая нялёгкая гісторыя нашай рэспублікі заклала аснову сённяшняга суіснавання розных нацыянальнасцяў на тэрыторыі Беларусі. На мір у нашай краіне ўплывае і такое паняцце, як гасціннасць. Беларусь – адкрытая краіна, і сёння да нас свабодна могуць прыехаць госці практычна з любой краіны свету. У 2023 годзе ў параўнанні з 2005-ым у 10 разоў павялічылася колькасць турыстаў, а экспарт турыстычных паслуг за гэтыя гады склаў мільярды беларускіх рублёў.
Важныя тэмы закранулі і іншыя спікеры. Так, Сяргей Пецкель расказаў прысутным пра асноўныя моманты Закона аб масавых мерапрыемствах. Таксама гучала тэма адказнасці за падпіску на экстрэмісцкія СМІ і распаўсюджванне экстрэмісцкіх матэрыялаў у інтэрнэце.
Аляксандр Малюгін звярнуў увагу ўдзельнікаў мерапрыемства на правілы пажарнай бяспекі ў святочны перыяд. Начальнік РАНС закрануў і тэму бяспекі на вадзе. Варта памятаць, што выхад на лёд магчымы толькі пры яго таўшчыні не меншай за 7 см. Таксама забаронена выходзіць на лёд без выратавальнай камізэлькі.
Аб шкоднасці азартных гульняў і прафілактыцы гульнявой залежнасці прысутным расказаў Андрэй Навіцкі.
Алег ШЫШЛОЎСКІ.
Фота аўтара.