Пытанні прафілактыкі правапарушэнняў і праяўленняў карупцыйнай накіраванасці былі разгледжаны на чарговым пасяджэнні раённай камісіі

Пытанні прафілактыкі правапарушэнняў і праяўленняў карупцыйнай накіраванасці былі разгледжаны на чарговым пасяджэнні раённай камісіі па супрацьдзеянні карупцыі пад кіраўніцтвам першага намесніка старшыні райвыканкама Ігара Аверкі.

Аб выкананні патрабаванняў заканадаўства, накіраванага на барацьбу з карупцыяй, у дзяржаўнай установе “Шчучынскі раённы цэнтр для забеспячэння дзейнасці бюджэтных арганізацый і дзяржаўных органаў” расказаў кіраўнік Іван Гваздоўскі.

– Цэнтр забяспечвае дзейнасць 56-ці бюджэтных арганізацый. З мэтай удасканалення арганізацыйных і прафілактычных мерапрыемстваў па прадухіленні карупцыі ў нашай установе створана камісія па супрацьдзеянні карупцыі. Значны аб’ём мерапрыемстваў, накіраваных на прафілактыку карупцыі, рэалізаваны па лініі кадравай работы, – адзначыў Іван Вікенцьевіч. – З 1 жніўня 2022 года, за час працы цэнтра праведзена 1760 дзяржаўных закупак тавараў, работ, паслуг у інтарэсах бюджэтных арганізацый і дзяржаўных органаў, якія абслугоўваюцца. Заключана і выканана дагавораў будаўнічага падраду на суму 1,77 млн рублёў. Асаблівая ўвага ўдзяляецца закупкам прадуктаў харчавання для патрэб устаноў адукацыі раёна. За час работы цэнтра зваротаў ад грамадзян і арганізацый аб карупцыйных правапарушэннях і фактах карупцыі, учыненых работнікамі, не паступала.

У сваю чаргу начальнік РАУС Аляксандр Мельнікаў адзначыў, што на тэрыторыі Шчучынскага раёна за 2023 год і бягучы перыяд 2024 года крымінальныя справы карупцыйнай накіраванасці не ўзбуджаліся. Разам з тым супрацоўнікамі міліцыі быў выяўлены шэраг парушэнняў, якія маюць карупцыйныя праявы.

Адзначалася, што кіраўнікі павінны ўзмацніць кантроль пры ажыццяўленні дзяржзакупак, не дапускаць канфлікту інтарэсаў, лабіравання інтарэсаў зацікаўленых асоб.

Далей у ходзе разгляду пытанняў парадку дня быў заслуханы даклад загадчыка сектара прававой і кадравай работы ўпраўлення сельскай гаспадаркі і харчавання райвыканкама Алены Забароўскай “Аб арганізацыі дагаворнай работы ў сельскагаспадарчых арганізацыях пры заключэнні і выкананні дагавораў, своечасовасці разлікаў”.

Гаворка ішла аб наяўнасці фактаў адсутнасці належнага кантролю з боку адказных службовых асоб за ходам выканання дагавораў: дапускаецца заключэнне дагавораў, якія пагаршаюць становішча прадпрыемстваў, не рыхтуюцца пратаколы рознагалоссяў, утвараецца крэдыторская запазычанасць, несвоечасова праводзіцца работа па дасудовым урэгуляванні рознагалоссяў. Удзельнікі пасяджэння былі аднадушныя ў тым, што правядзенне абавязковай пераддагаворнай работы, юрыдычнай экспертызы пры заключэнні дагавораў, выключэнне выпадкаў пратэрміноўкі выканання дагаворных абавязацельстваў з’яўляецца адным са спосабаў забеспячэння эканамічнай бяспекі арганізацый.

– Найбольш распаўсюджанымі прычынамі і ўмовамі, якія спрыяюць здзяйсненню карупцыйных злачынстваў, з’яўляюцца неналежнае стаўленне службовых асоб да сваіх службовых абавязкаў, адсутнасць адпаведнага бухгалтарскага або дакументальнага ўліку, – падкрэсліў Ігар Аверка. – Толькі пастаянны, прынцыповы кантроль на ўсіх узроўнях і дакладнае прытрымліванне дзеючага заканадаўства дазволяць мінімізаваць магчымасці карупцыйных праяўленняў.

Па выніках пасяджэння былі дадзены рэкамендацыі па асобных пытаннях прафілактыкі карупцыйных і іншых злачынстваў, вызначаны задачы на ​​бліжэйшы перыяд і тэрміны іх выканання.

Сяргей КАСПЯРЧУК.
Фота аўтара.