Як правесці навагоднія святы весела і бяспечна?
Набліжаюцца навагоднія святы. Узняць настрой, нават калі на вуліцы плюсавая тэмпература і снегу не відаць, нескладана. Па традыцыі можна напярэдадні ўпрыгожыць гірляндай ёлку, набыць прыгожую сукенку, прыгатаваць любімую страву, а ў навагоднюю ноч запусціць салют, наведаць святочнае мерапрыемства або запаліць бенгальскія агні пад бой курантаў. Здаецца, усе гэтыя атрыбуты нам добра знаёмыя, але спецыялісты ўсё ж-такі нагадваюць аб мерах бяспекі і рэкамендуюць ставіцца да гэтага святочнага часу больш асэнсавана, каб не дапусціць непрыемных інцыдэнтаў.
Ратавальнікі да Новага года гатовы!
Памочнік міністра — прэс-сакратар МНС Яўген Бараноўскі расказаў, што ў краіне напярэдадні навагодніх святаў рэалізуецца шырокі спектр мер па недапушчэнні пажараў як на аб’ектах правядзення масавых святочных мерапрыемстваў, так і ў прыватных домаўладаннях грамадзян. Праводзіцца актыўная работа па правядзенні наглядна-прафілактычных мерапрыемстваў на аб’ектах, якія будуць задзейнічаны ў правядзенні калядных і навагодніх святаў. Асаблівая ўвага пры праверцы надаецца падрыхтоўцы персаналу, стану праездаў і пад’ездаў да аб’ектаў, спраўнасці сістэм пажарнай аўтаматыкі, шляхам эвакуацыі, наяўнасці першасных сродкаў пажаратушэння. У цяперашні час праведзены абследаванні супрацьпажарнага стану больш за 2,5 тысяч такіх аб’ектаў. Гэта найперш установы культуры і адукацыі. Праводзяцца гутаркі з кіраўнікамі аб’ектаў і арганізацый, бо менавіта на іх ляжыць адказнасць за забеспячэнне пажарнай бяспекі. Увогуле, па словах Яўгена Бараноўскага, сістэма МНС гатовая да правядзення святочных мерапрыемстваў.
Што датычыцца дабрачыннай акцыі «Нашы дзеці», падчас яе правядзення ў Палацы Рэспублікі будзе арганізавана дзяжурства работнікаў МНС, будуць выстаўлены нарады і баявы разлік на спецыяльнай тэхніцы. У месцах пражывання і харчавання дзяцей таксама будуць дзяжурыць работнікі МНС, у тым ліку і ў начны час.
Запускаць салюты з розумам
Звярнуў увагу Яўген Бараноўскі і на выкарыстанне піратэхнічных вырабаў. Найперш трэба ўважліва прачытаць інструкцыю, параіў прэс-сакратар МНС.
— Усе вырабы павінны быць сертыфікаваны, на ўпакоўцы павінны быць нанесены патрабаванні бяспекі, — адзначыў Яўген Бараноўскі. —Таксама неабходна звяртаць увагу на тэрмін прыдатнасці вырабу. Акрамя таго, трэба ўлічваць небяспечную зону, каб людзі, якія знаходзяцца побач і чакаюць святочнага салюту, адыходзілі на бяспечную адлегласць, якая ўказана на ўпакоўцы.
Піратэхніку, па словах прадстаўніка МНС, забараняецца ўжываць у месцах, дзе знаходзіцца вялікая колькасць людзей, на паркоўках, побач з лініямі электраперадач, у жылых масівах. Салют павінен быць вельмі моцна усталяваны. Выкарыстоўваць піратэхніку павінны паўналетнія, дзяцей трэба праінструктаваць па асноўных пытаннях бяспекі.
Фота: pixabay.com
Звярнулі ўвагу і на ўтылізацыю піратэхнічных вырабаў. Нярэдкія выпадкі, калі салют не спрацоўвае. Ёсць стандартныя правілы, як сябе паводзіць у такім выпадку. Па-першае, не трэба бегчы да феерверка, салюту або петарды. Пачакайце ад пятнаццаці да трыццаці хвілін. Пасля таго, як вы пераканаліся, што піратэхніка не выбухнула, рэкамендуецца замачыць выраб на суткі, а ўжо потым утылізаваць яго разам з цвёрдымі бытавымі адходамі.
Патрабаванні па выкарыстанні піратэхнічных вырабаў тэхнічнага прызначэння рэгламентуюцца тэхнічным рэгламентам Мытнага саюза. Выкарыстанне дазваляецца толькі юрыдычным асобам, якія атрымалі адпаведны дазвол. Выдачай дазволаў займаецца МНС, у асобе Дэпартамента па наглядзе за бяспечным вядзеннем работ у прамысловасці (Дзяржпрамнагляд). На бягучы момант арганізацый, якія атрымалі гэты дазвол, налічваецца трынаццаць.
Пры арганізацыі феерверачных паказаў выканаўца павінен распрацаваць план мерапрыемстваў па забеспячэнні прамысловай бяспекі і не пазней чым за тры працоўныя дні да вызначанай даты пісьмова паведаміць мясцовыя выканаўчыя і распарадчыя органы, тэрытарыяльныя органы ўнутраных спраў, органы па надзвычайных сітуацыях і Дзяржпрамнагляд.
Раз, два, тры...
Пры куплі гірлянды на ёлку абавязкова трэба звяртаць увагу на наяўнасць сертыфіката. Правады гірлянды павінны мець надзейную ізаляцыю, не мець заломаў і расколін. Пры выбары гірлянды варта аддаваць перавагу менш магутным варыянтам. Не рэкамендуецца выкарыстоўваць адначасова больш за тры гірлянды. Яшчэ парада: не пакідайце гірлянды ўключанымі, выключайце іх, калі спіце або выходзіце з хаты. Акрамя таго, варта прагаварыць правілы бяспекі з дзецьмі, расказаць ім, што гэта не цацкі, — дадаў прэс-сакратар МНС.
Фота: pixabay.com
Паводле яго слоў, у гэтым годзе істотна павялічылася колькасць пажараў і гібелі на іх людзей.
— На бягучы момант ужо больш за 6 тысяч пажараў адбылося па ўсёй краіне, загінулі 524 чалавекі. Асноўных прычын узнікнення пажараў тры: неасцярожнае абыходжанне з агнём пры курэнні, парушэнне правілаў эксплуатацыі электрасетак і электраабсталявання, парушэнне правілаў эксплуатацыі печаў і цеплагенерыруючых прылад. Наш досвед працы паказвае, што трагедыя можа здарыцца з кожным і, як правіла, адбываецца з тымі, хто недаацэньвае магчымасць узнікнення пажару ў сваім жыллі«, — падкрэсліў Яўген Бараноўскі.
Узмоцнены варыянт нясення службы
Новы год і Каляды застаюцца аднымі з самых любімых святаў для беларусаў. Начальнік аддзела па масавых мерапрыемствах упраўлення аховы правапарадку галоўнага ўпраўлення аховы правапарадку і прафілактыкі МУС Сяргей Лосіч адзначыў, што МУС загадзя арганізавала падрыхтоўку па пытаннях забеспячэння бяспекі на гэты час. Ужо рэалізуюцца ўсе арганізацыйныя і практычныя меры, распрацаваны і зацверджаны адпаведныя распарадчыя дакументы, у якіх вызначаны канкрэтныя даручэнні для службаў і падраздзяленняў, наладжана ўзаемадзеянне з усімі зацікаўленымі дзяржаўнымі органамі на рэспубліканскім і мясцовым узроўнях. У святочныя дні асабісты склад органаў унутраных спраў і ўнутраных войскаў МУС пераходзіць на ўзмоцнены варыянт нясення службы. Ва ўсіх месцах правядзення мерапрыемстваў будуць дзяжурыць супрацоўнікі міліцыі. Традыцыйна будзе арганізавана работа пунктаў пропуску з папярэднім аглядам тэрыторыі сапёрамі. Асаблівую ўвагу надалі забаўляльным установам: бары, кафэ, рэстараны і іншыя. Асобы, якія знаходзяцца ў стане алкагольнага ап’янення або маюць забароненыя для праносу прадметы, дапускацца ў месцы масавых гулянняў не будуць. Азнаёміцца з пералікам забароненых рэчаў можна на спецыяльных стэндах, размешчаных каля кантрольна-прапускных пунктаў.
Што тычыцца забеспячэння дарожнай бяспекі, паблізу месцаў правядзення масавых гулянняў у выпадку неабходнасці будуць прыняты меры па абмежаванні руху транспарту або поўным блакіраванні шляхоў пад’езда з выкарыстаннем тэхнічных прыстасаванняў. Сяргей Лосіч параіў тым грамадзянам, якія плануюць прыехаць да месцаў святочных мерапрыемстваў, паклапаціцца пра месца паркоўкі свайго аўтамабіля і выязджаць загадзя. Варта яшчэ звярнуць увагу на ўмовы надвор’я і хуткасны рэжым — невыкананне вызначаных правілаў дарожнага руху можа прывесці да цяжкіх наступстваў.
Выбірайце мерапрыемства па густу
У Мінску запланавана вялікая колькасць калядных і навагодніх мерапрыемстваў, расказаў начальнік упраўлення аховы правапарадку і прафілактыкі ГУУС Мінгарвыканкама Сяргей Гарохаў.
— Усяго больш за 400 лакацый, — удакладніў ён. — У навагоднюю ноч у сталіцы асноўныя мерапрыемствы будуць праводзіцца на пляцоўцы каля Палаца спорту з 0.30 да 4.00. Пры правядзенні святочных мерапрыемстваў рашэннем Мінгарвыканкама ўзгоднена рэалізацыя алкаголю ў разліў, аднак выключна ў месцах правядзення асноўных мерапрыемстваў, кірмашоў каля Палаца спорту, а таксама на раённых пляцоўках. На мерапрыемствы на пляцоўцы каля Палаца спорту можна будзе прыбыць праз КПП па напрамках з боку пр. Пераможцаў, дом № 2, праз падземны пераход каля ГЦ «Галерэя» і непасрэдна ў раёне Палаца спорту. Прадугледжаны асобныя пункты пропускаў для інвалідаў, ветэранаў, бацькоў з малалетнімі дзецьмі. Яны будуць пазначаныя аранжавым тэнтам.
Каб прадухіліць чэргі ў месцах пропуску, праваахоўнікі просяць грамадзян прыбываць на мерапрыемствы загадзя і абмежавацца наяўнасцю пры сабе толькі самых неабходных рэчаў. Сяргей Гарохаў паведаміў, што перад кожным КПП будзе размешчаны інфармацыйны стэнд з указаннем тых рэчаў, якія забароненыя да праносу. Такую маёмасць можна будзе пакінуць у камеры захавання.
Праходзіць на мерапрыемства з хатнімі жывёламі, веласіпедамі, сродкамі персанальнай мабільнасці таксама будзе забаронена. Дапускаецца праносіць безалкагольныя вадкасці ў пластыкавай празрыстай тары аб’ёмам не больш за 0,5 літра, адзначыў начальнік упраўлення аховы правапарадку.
Звярнуў асаблівую ўвагу ён таксама і на тое, што ажыццяўленне пры правядзенні масавых мерапрыемстваў якіх-небудзь несанкцыянаваных дзеянняў, грамадскае выказванне грамадска-палітычных меркаванняў можа быць прыраўнавана да несанкцыянаванага масавага мерапрыемства. У дачыненні да асоб, якія парушылі дадзенае патрабаванне, можа быць распачаты адміністрацыйны працэс.
Канцэрты, прысмакі, цікавыя навінкі
Намеснік начальніка ўпраўлення — начальнік аддзела каардынацыі паставак тавараў на ўнутраны рынак упраўлення каардынацыі паставак тавараў на ўнутраны рынак і знешнегандлёвай дзейнасці канцэрна «Белдзяржхарчпрам» Алена Белановіч запэўніла, што айчынныя вытворцы таксама гатовыя да перадсвяточных мерапрыемстваў. Самымі запатрабаванымі таварамі ў навагоднія святы з’яўляюцца кандытарскія і алкагольныя выбары. Яны сёлета прадстаўлены не толькі ў аб’ектах гандлю, якія размяшчаюцца ў крокавай даступнасці, але і фірменнай сеткай. Кандытарская галіна налічвае больш за 150 аб’ектаў гандлю, алкагольная — больш за 130 аб’ектаў па ўсёй краіне.
— Варта адзначыць, што да святочных мерапрыемстваў ужо ў магазінах аформлены і фотазоны, іграе музыка. Для зручнасці наведвальнікаў у аб’ектах гандлю арганізаваны таксама дадатковыя месцы продажаў тавараў, — паведаміла Алена Белановіч. — Нашы вытворцы прадугледзелі і навінкі: разнастайныя начынкі шакаладу, прысмакі без цукру. Думаю, што мы зможам задаволіць запыты кожнага пакупніка.
Фота: БелТА
Намеснік начальніка галоўнага ўпраўлення — начальнік аддзела гандлю і паслуг галоўнага ўпраўлення гандлю і паслуг Мінскага гарадскога выканаўчага камітэта Ірына Маслакова анансавала мерапрыемствы, якія пройдуць у Мінску для падтрымкі ў жыхароў і гасцей сталіцы святочнага настрою. Пры іх арганізацыі, падкрэсліла яна, былі прадугледжаны ўсе меры бяспекі. Галоўнай пляцоўкай застаецца пляцоўка каля Палаца спорту. Яна ўжо ўпрыгожана і актыўна функцыянуе: у драўляных хатках-шале прадстаўлены разнастайны асартымент прадукцыі з акцэнтам на прадукцыю беларускай вытворчасці. Можна пачаставацца і гарачым блінцамі, і хрумсткімі дранікамі, гарачым шакаладам ці какаа. Прадугледзелі таксама ежу і для тых, хто выконвае Калядны пост. У наяўнасці і дзіцячае меню. Пачынаючы з 25 снежня, на гэтай пляцоўцы будуць праводзіцца святочныя мерапрыемствы, канцэрты, а таксама будуць працаваць атракцыёны. Няхай Новы год і Каляды пройдуць весела і бяспечна!