Вынікі работы за мінулы год падвялі ў ААТ “Першамайск-агра”
На гэтым тыдні вынікі работы за мінулы год падвялі работнікі ААТ “Першамайск-агра”. Справаздачны сход адбыўся ў актавай зале Першамайскай сярэдняй школы і сабраў работнікаў прадпрыемства на чале з яго кіраўніком Віктарам Дзядовічам. Таксама ўдзел у мерапрыемстве ўзялі намеснік старшыні Шчучынскага райвыканкама Ігар Аверка, дырэктар ААТ “Васілішкі” Антон Бурнос і старшыня Першамайскага сельвыканкама Наталля Сідлярэвіч.
Зробленае прадпрыемствам за мінулы год прааналізаваў Віктар Дзядовіч падчас свайго даклада. Кіраўнік адзначыў станоўчую дынаміку ў развіцці гаспадаркі. Так, у раслінаводстве прагнозныя паказчыкі па вытворчасці валавай прадукцыі былі выкананы на 108,2%. Валавая вытворчасць збожжа склала 4306 тон, што на 69 тон больш за ўзровень 2023 года. Ураджайнасць збожжавых культур летась склала 48,9 ц/г. Валавы збор масланасення рапсу ў 2024 годзе склаў 877 тон, што 139 тон вышэй чым у 2023 годзе.
Пад ураджай гэтага года ў ААТ “Першамайск-агра” пасеяны 750 гектараў азімых збожжавых культур і 300 гектараў азімага рапсу.
Добрых вынікаў у 2024 годзе дасягнула жывёлагадоўля. Вытворчасць валавай прадукцыі ў гэтай галіне была выканана на 115,7%. Валавая вытворчасць малака склала 6222 тоны, што на 934 тоны больш, чым у 2023 годзе. Надой на адну карову вырас на 699 кг і дасягнуў 7807 кг. Таварнасць малака склала 93,9%.
Пагалоўе буйной рагатай жывёлы ў гаспадарцы ў пачатку 2025 года складала 1682 галавы з іх 797 дойных кароў.
У 2025 годзе перад прадпрыемствам стаіць задача надаіць 6750 тон малака пры сярэднім надоі на адну карову 8364 кг, у раслінаводстве валавая вытворчасць збожжа павінна дасягнуць 4364 тоны, пры ўраджайнасці 50,7 ц/г. Валавая вытворчасць рапсу павінна скласці 1050 тон.
Як адзначыў Віктар Дзядовіч, істотны ўплыў на развіццё ААТ “Першамайск-агра” працягвае аказваць дапамога ад ААТ “Васілішкі”:
– Пад’ём “Першамайск-агра” быў бы немагчымы без дапамогі ААТ “Васілішкі” па прычыне недахопу грашовых сродкаў і высокага зносу машынатрактарнага парку. Сёлета нам аказваліся паслугі па ворыву, падрыхтоўцы глебы, сяўбе, нарыхтоўцы кармоў, збору ўраджаю, хімічнай праполцы і многаму іншаму.
Ігар Аверка звярнуў увагу прысутных на выніках сельскай гаспадаркі ўсяго раёну, а таксама адказаў на хвалюючыя пытанні прысутных. Сярод актуальных тэм, якія абмяркоўваліся на сходзе было далейшае развіццё ААТ “Першамайск-агра”. Таксама прысутныя асобна спыніліся на адной з галоўных праблем сферы – кадравым пытанні.
– Ад сябе асабіста і ад імя Шчучынскага раённага выканаўчага камітата дзякую вам за работу. Сапраўды, зроблена многа і многа яшчэ трэба зрабіць. Жыццё не стаіць на месцы і мы будзем імкнуцца да лепшага. Хачу пажадаць усім задроўя, міру, дабрыні і, вядома, дасягнення новых працоўных поспехаў, – звярнуўся да прысутных напрыканцы свайго выступу Ігар Аверка.
Далей мерапрыемства працягнулася ўрачыстай цырымоніяй узнагароджвання лепшых работнікаў ААТ “Першамайск-агра”. Святочны настрой удзельнікам мерапрыемства падарыў канцэрт мясцовых артыстаў.
Алег ШЫШЛОЎСКІ.
Фота аўтара.