«Усё пакінуць след павінна…»
Гэтыя словы Петруся Броўкі сталі своеасаблівым дэвізам для вучняў 11 класа Каменскага дзіцячага сада-сярэдняй школы.
Традыцыйна выпускнікі школы на свята апошняга званка выпускаюць паветраныя шары, якія, як адзначаюць эколагі, наносяць вялікую шкоду прыродзе.
А вось нашы вучні вырашылі адмовіцца ад гэтага. Яны заклалі сапраўды добрую традыцыю: штогод высаджваць дрэвы, кусты, кветкі. Пры падтрымцы бацькоў, педагогаў вучні высадзілі на тэрыторыі школы 20 туй. Сімвалічна, што гэтую справу яны прысвяцілі важнай даце: 75-годдзю Вялікай Перамогі. Вучні зрабілі прыгожую клумбу ў выглядзе зоркі і высадзілі расліны каля памятнага знака лётчыкам 127 знішчальнага авіяпалка, якія загінулі ў першы дзень Вялікай Айчыннай вайны.
Да свята апошняга званка яшчэ амаль месяц, а вось годныя справы ўжо робяцца. Выпускнікі пакідаюць пасля сябе добры след.
Жана ВАРОНИК,
намеснік дырэктара па вучэбна-выхаваўчай рабоце Каменскага дзіцячага сада-сярэдняй школы.