У Шчучыне прайшло пасяджэнне раённай камісіі па супрацьдзеянні карупцыі

Пытанні прафілактыкі правапарушэнняў і праяўленняў карупцыйнай накіраванасці былі разгледжаны на чарговым пасяджэнні раённай камісіі па супрацьдзеянні карупцыі пад кіраўніцтвам старшыні райвыканкама А.В. Садоўскага. У рабоце камісіі прыняў удзел пракурор Шчучынскага раёна А.У. Дзямідаў.

У пачатку старшыня камісіі яшчэ раз нагадаў прысутным пра тое, якія пытанні на працягу года былі разгледжаны на пасяджэннях камісіі, на якія важныя аспекты ў арганізацыі работы ўстаноў і арганізацый была звернута ўвага яе кіраўнікоў з мэтай недапушчэння карупцыйных праяў.

З інфармацыяй аб стане карупцыйнай накіраванасці злачынстваў на тэрыторыі раёна ў першым паўгоддзі бягучага года выступіў першы намеснік начальніка РАУС Д.Г. Фамчанкоў. У выніку праведзеных аддзелам унутраных спраў райвыканкама ва ўзаемадзеянні з іншымі праваахоўнымі органамі мерапрыемстваў на тэрыторыі раёна ў сферы эканомікі  выяўлена 6 злачынстваў. Дзмітрый Георгіевіч прывёў шэраг прыкладаў, калі былі выяўлены і расследаваны альбо расследуюцца факты карупцыйных праяў. Былі распачаты крымінальныя справы за перавышэнне службовых паўнамоцтваў і за крадзеж шляхам злоўжывання службовымі паўнамоцтвамі. Шкода па выяўленых карупцыйных злачынствах склала амаль дваццаць тры тысячы рублёў.

Далей у ходзе разгляду пытанняў парадку дня былі заслуханы справаздачы начальніка Шчучынскай раённай ветэрынарнай станцыі С.А. Шэршаня, галоўнага ўрача Шчучынскай цэнтральнай раённай бальніцы І.У. Загароўскага і загадчыка юрыдычнага сектара райвыканкама А.Г. Пятровіча аб захаванні патрабаванняў заканадаўства пры ажыццяўленні дзяржаўных закупак падведамаснымі арганізацыямі, структурнымі падраздзяленнямі райвыканкама, сельскімі выканаўчымі камітэтамі.

Адзначалася, што кіраўнікі павінны ўзмацніць кантроль пры ажыццяўленні дзяржзакупак і правядзенні інвентарызацыі матэрыяльных каштоўнасцяў, не дапускаць канфлікту інтарэсаў, лабіравання інтарэсаў зацікаўленых асоб. Члены камісіі ацанілі пазітыўныя моманты і ўнеслі канструктыўныя прапановы.

Як падкрэсліў старшыня камісіі А.В. Садоўскі, каб папярэдзіць супрацьпраўныя дзеянні ў шэрагу арганізацый раёна, неабходна захоўваць выканальніцкую і працоўную дысцыпліну, наладзіць першасны ўлік, каб не быць прыцягнутымі да адміністрацыйнай і крымінальнай адказнасці. “Кожны спецыяліст павінен добрасумленна выконваць свае прафесійныя і службовыя абавязкі. Важна педантычна ставіцца да расходавання бюджэтных сродкаў. Асаблівых складанасцяў у правядзенні працэдуры дзяржаўных закупак няма, калі няма жадання парушыць заканадаўства. Недапушчальна сама думка, што магчыма нешта ўтаіць або схаваць. Але, самае галоўнае, усе павінны разумець, якія будуць наступствы пры здзяйсненні падобнага роду правапарушэнняў”.

Пракурор Шчучынскага раёна А.У. Дзямідаў звярнуў увагу прысутных на існуючыя праблемныя моманты. На думку Аляксандра Уладзіміравіча, менавіта кіраўнікі арганізацый абавязаны прымаць меры па выкананні антыкарупцыйнага заканадаўства. Недапушчальна перасаджваць з аднаго месца на іншае адказных асоб, якія дыскрэдытавалі сябе па розных падставах. Асобнае пытанне – разгляд і паўната рэагавання на прадстаўленні пракуратуры, правільнасць запаўнення дэкларацый і ўказанне ў іх пэўных звестак. Пракурор раёна станоўча ахарактарызаваў работу раённай камісіі і выказаў упэўненасць, што дакладнае выкананне заканадаўства дазволіць мінімізаваць магчымасці карупцыйных праяў.

На пасяджэнні таксама абмеркавалі інфармацыйныя матэрыялы Генеральнай пракуратуры Рэспублікі Беларусь “Аб практыцы прымянення патрабаванняў некаторых артыкулаў Закона “Аб барацьбе з карупцыяй”, упраўлення Следчага камітэта па Гродзенскай вобласці “Аб прычынах і ўмовах, якія садзейнічаюць здзяйсненню карупцыйных злачынстваў” і іншыя дакументы, накіраваныя на барацьбу са злачыннасцю і карупцыяй.

Па выніках пасяджэння былі дадзены рэкамендацыі па асобных пытаннях прафілактыкі карупцыйных і іншых злачынстваў, вызначаны задачы на ​​бліжэйшы перыяд і тэрміны іх выканання.

Сяргей КАСПЯРЧУК.

Фота аўтара.