Сяўба ідзе па раскладзе. На мінулым тыдні аграрыі ААТ “Шчучынаграпрадукт” сеялі авёс сорту “шанс”

Зараз аграрыі Шчучыншчыны актыўна занятыя на вясенне-палявых работах. Тэхніка працуе ў палях, і хоць надвор’е пакуль не дае разгарнуцца на ўсю моц, сяўба яравых культур праходзіць згодна з тэхналагічнымі патрабаваннямі. Як спрацуеш вясной, так атрымаеш і летам – гэтую формулу добра ведаюць у ААТ “Шчучынаграпрадукт”.

Сёлета ў ААТ “Шчучынаграпрадукт” вясеннюю сяўбу пачалі прыкладна як і летась – 12 сакавіка. Уся неабходная тэхніка адрамантавана і гатова да работы. Акрамя сяўбы актыўна ідзе закрыццё вільгаці, ворыва, унясенне мінеральных і арганічных угнаенняў у глебу. Усяго ў палях працуе зараз 12 адзінак тэхнікі.

Нядаўна на полі каля вёскі Быкаўка мясцовыя аграрыі сеялі авёс. Сорт “шанс” першай рэпрадукцыі выкарыстоўваецца ў гаспадарцы другі сезон, летась ён добра сябе зарэкамендаваў.

На трактары шчыруе Андрэй Комар. Звычайна ён працуе кіроўцам на МАЗе, але вытворчая неабходнасць запатрабавала змяніць тэхніку.

– У гаспадарцы працую ўжо 12 гадоў, – расказвае Андрэй Комар. – Спачатку быў механізатарам, потым перайшоў на МАЗ. Зараз прадпрыемства мае патрэбу ў механізатарах, таму дапамагаю на сяўбе. У мінулым годзе таксама сеяў азімыя культуры. Работа для мяне не новая, таму праца ідзе добра – за дзень атрымліваецца апрацаваць ад 40 да 50 гектараў у залежнасці ад поля. Тэхніка надзейная: моцны трактар “Беларус” МТЗ-3522 і сеялка “HORSCH” мяне не падводзяць. Сучасныя тэхналогіі робяць працу зручнай. Так, пры сяўбе аўса трэба пільна сачыць за нормай высеву, якая павінна складаць 200 кілаграмаў насення на гектар. Выконваць тэхналагічныя патрабаванні дапамагае камп’ютар. Таксама трактар абсталяваны аўтапілотам, што значна аблягчае працу.

Сам Андрэй Комар родам з Новага Двара. Кажа, што за 12 гадоў прадпрыемства ўжо стала родным. Яго жонка таксама працуе ў ААТ “Шчучынаграпрадукт” на пасадзе ветурача, яны маюць дваіх дзетак. Ад гаспадаркі сям’я атрымала кватэру. Як адзначае механізатар, умовы працы яго цалкам задавальняюць. Годны заробак, камфортныя ўмовы і добрае стаўленне з боку кіраўніцтва даюць стымул старанна працаваць і дасягаць поспеху.

Алег ШЫШЛОЎСКІ.
Фота аўтара.