Свята слова і творчасці. Як на Шчучыншчыне адзначылі Дзень пісьменнікаў?
У пятніцу ў сценах раённай бібліятэкі імя Цёткі адбылася сустрэча пісьменнікаў Шчучыншчыны. Яна стала сапраўдным святам для ўсіх аматараў літаратуры. Гэта ўрачыстае мерапрыемства аб’яднала як вядомых пісьменнікаў, паэтаў, так і маладых аўтараў, якія толькі пачынаюць свой творчы шлях.
Удзел у свяце прынялі ганаровыя госці, сярод якіх былі старшыня Шчучынскага раённага Савета дэпутатаў Ганна Хвядзюк і старшыня Гродзенскага абласнога аддзялення Саюза пісьменнікаў Беларусі Людміла Кебіч.
Свята слова адкрылася выступленнем Людмілы Антонаўны, якая прадставіла свае творы. Вядомая паэтэсса расказала пра свой шлях у літаратуру і падзялілася, чаму піша менавіта на беларускай мове.
– Шаноўныя сябры, сёння мы сабраліся тут, каб адзначыць наша свята – Дзень пісьменніка. І сімвалічна, што такое мерапрыемства праходзіць у дзень роднай мовы. Мова – гэта душа народа, яго гісторыя, культура і ідэнтычнасць. Кожны твор з’яўляецца часцінкай нашай самабытнасці. Захаваць родную мову – наш абавязак перад будучымі пакаленнямі.
Людміла Антонаўна прачытала некалькі сваіх вершаў і пажадала ўсім прысутным ведаць і цаніць сваё мінулае і будучае.
Далей свае творы прадэманстравалі Іван Пяшко, лаўрэат прэміі часопіса «Вожык» і абласной прэміі імя Цёткі, Рычард Бялячыц, лаўрэат прэміі Дубко ў намінацыі “Пісьменнік года”, Уладзімір Руль, аўтар слоў песен пра Шчучын і Астрыну і іншыя.
Асаблівую цікавасць выклікала выступленне Уладзіміра Ягорычава, кандыдата гістарычных навук, які падзяліўся сваімі поглядамі на ролю літаратуры ў захаванні гістарычнай памяці. А малады аўтар Аляксандр Чайко даў магчымасць прыкмеціць новыя імёны на літаратурным небасхіле.
Дзень пісьменніка на Шчучыншчыне пазнаёміў гасцей свята з новымі творамі, а таксама аб’яднаў розныя пакаленні пісьменнікаў і паэтаў.
Таццяна ГЕРАСІМЧЫК.
Фота аўтара.