Сакавіты запас ААТ “Васілішкі”. Даведаліся, як на працягу ўсяго года ў сховішчы каля вёскі Карэвічы эфектыўна захоўваецца садавіна і гародніна

Пакуль аграрыі Шчучыншчыны старанна рыхтуюцца да пачатку вясенне-палявых работ, са сховішча сельгаспрадукцыі ААТ “Васілішкі” каля вёскі Карэвічы ідзе адгрузка на продаж леташняга ўраджаю.

Сакавітая прадукцыя з мясцовых садоў і палёў паспяхова зімуе і рэалізуецца на працягу ўсяго года.

Сховішча садавіны і гародніны каля вёскі Карэвічы было ўведзена ў эксплуатацыю ў 2010 годзе. У галоўным будынаку комплексу знаходзіцца 16 высокатэхналагічных камер для захоўвання прадукцыі. Іх памеры ўражваюць – кожная вышынёй 9 метраў і можа ўмяшчаць да 210 тон прадукцыі. Увогуле сховішча разлічана прыкладна на 3000 тон сакавітага ўраджаю з палёў і садоў ААТ “Васілішкі”.

У кожнай камеры можна выставіць тэмпературу і вільготнасць пад патрэбы пэўнай культуры. Напрыклад, морква захоўваецца пры тэмпературы ад 1 да 2 градусаў па Цэльсію і вільготнасці 94%. Капуста добра зімуе пры 0-1 °C і вільготнасці 90%. Цыбуля любіць тэмпературу 0 °C і вільготнасць 89%. Яблыкі, у залежнасці ад гатунку, захоўваюцца пры тэмпературы ад 0 да 3 °C. Усе паказчыкі скрупулёзна выконваюцца і пастаянна адсочваюцца на працягу дня.

Яблыкі, морква, цыбуля і капуста са сховішча рэалізуюцца як дзяржаўным, так і прыватным арганізацыям, а таксама выкарыстоўваюцца для закладкі стабілізацыйных фондаў. Таму гэты аб’ект можна назваць стратэгічна важным для захавання харчовай бяспекі нашага рэгіёна.

З кожным годам ураджай у ААТ “Васілішкі” планамерна павялічваецца, таму перад работнікамі сховішча ўзнікае нялёгкая задача – як усё ўмясціць.

– Сёлета наша гаспадарка сабрала 1860 тон яблыкаў, 560 тон цыбулі, 1060 тон капусты 1000 тон морквы і 30 тон сталовых буракоў, – адзначае загадчыца сховішча Наталля Жолік. – Гэта валавы збор. Вядома, не ўвесь ураджай закладваўся ў сховішча, пэўная яго частка прадавалася яшчэ восенню. Сёлета думалі, што ўсё і не ўлезе, вельмі ўраджайны быў год. Хутка напаўнялі камеры, прадавалі прадукцыю, потым усё запаўнялі па-новаму. У кастрычніку сховішча было цалкам запоўнена. Да лютага ўжо многа прадукцыі рэалізавалі, і зараз некаторыя камеры стаяць напаўпустыя.

Для эфектыўнай работы сховішча, асабліва восенню, патрэбна добра наладжаная сістэма продажу прадукцыі. Зараз з гэтым праблем няма, бо гародніна і садавіна з ААТ “Васілішкі” высока цэніцца і запатрабавана як на ўнутраным, так і на замежным рынку. Аднак, улічваючы рост ураджайнасці прадукцыі ў гаспадарцы, паўстае патрэба пашыраць плошчы сховішча. Такія планы ёсць.

Большую частку працоўнага калектыву сховішча складаюць сезонныя работнікі. Зараз у памяшканні для сартавання прадукцыі яны рыхтуюць партыю капусты для крамаў гандлёвай сеткі “Еўраопт”. Жанчыны і мужчыны старанна ачышчаюць качаны і затарваюць іх у сеткі. Далей прадукцыя загружаецца ў транспарт. Вялікая рампа можа прыняць адначасова да дзесяці грузавікоў.

Акрамя “Еўраопта” пастаяннымі пакупнікамі мясцовай гародніны з’яўляюцца такія вядомыя гандлёвыя сеткі, як “Гіппа” і “Дабраном”. Самая вялікая доля адгрузак прыпадае на Гродзенскае аблспажыўтаварыства, якое рэалізуе прадукцыю насельніцтву праз крамы гандлёвай сеткі “Родны Кут”. Як адзначае Наталля Жолік, іх грузавікі кожны дзень курсіруюць паміж райцэнтрамі Гродзеншчыны і сховішчам у Карэвічах. Таму без сумненняў можна казаць, што мясцовая прадукцыя забяспечвае вітамінамі ўсю нашу вобласць і часткова краіну.

Алег ШЫШЛОЎСКІ.

Фота аўтара.