На нарадзе ў старшыні райвыканкама Аляксея Садоўскага абмеркавалі пытанні сацыяльна-эканамічнага развіцця раёна

У аўторак на нарадзе ў старшыні райвыканкама Аляксея Садоўскага традыцыйна абмяркоўваліся пытанні сацыяльна-эканамічнага развіцця раёна.

Як звычайна, шэраг пытанняў датычыў сельскай гаспадаркі. Як праінфармаваў першы намеснік начальніка ўпраўлення сельскай гаспадаркі і харчавання райвыканкама Андрэй Клімовіч, сельскагаспадарчымі арганізацыямі раёна ажыццяўляецца падрыхтоўка тэхнікі да правядзення вясенне-палявых работ. Актыўна вядзецца нарыхтоўка мінеральных угнаенняў, якіх назапашана 57% ад неабходнага. У бліжэйшы час плануецца завяршыць вывазку арганічных угнаенняў.

-- Галоўнае для аграрыяў на сёння – прыняць меры па набыцці і назапашванні мінеральных угнаенняў, сродкаў аховы раслін, забяспечыць закупкі гаруча-змазачных матэрыялаў у неабходнай колькасці. Не менш як 95 працэнтаў тэхнікі для правядзення веснавых палявых работ павінна быць гатова да 1 сакавіка, -- падкрэсліў старшыня райвыканкама Аляксей Садоўскі. – Нарыхтоўка насеннага фонду для сяўбы -- пытанне стратэгічнага характару.

У сферы жыллёва-камунальнай гаспадаркі абмяркоўваліся пытанні будаўніцтва і рамонту аб'ектаў у 2023 годзе. Кіраўніка раёна цікавілі этапы правядзення капітальных рамонтаў жылых дамоў -- ад вырабу праектна-каштарыснай дакументацыі да тэрмінаў пачатку і завяршэння ўсіх работ. У цэнтры ўвагі -- пытанні пракладкі сёлета 6,1 км цепласетак, будаўніцтва станцыі абезжалезвання ў аграгарадку Новы Двор і іншае.

Немалаважнае пытанне -- забеспячэнне бяспекі грамадзян. Кіраўнік раёна Аляксей Садоўскі акцэнтаваў увагу, што ў полі зроку суб'ектаў прафілактыкі павінна быць катэгорыя адзінокіх і адзінокіх грамадзян, старэйшых за 80 гадоў, якія могуць стаць ахвярамі агню. Аляксей Валянцінавіч даручыў звярнуць самую пільную ўвагу на выкананне правілаў пажарнай бяспекі гэтай катэгорыяй грамадзян: наяўнасць аўтаномных пажарных апавяшчальнікаў і праверку іх працаздольнасці, вывад пры неабходнасці АПА на сігнальна-гукавую прыладу. Не сакрэт, што большасць пажараў у прыватных домаўладаннях адбываюцца менавіта ў той момант, калі чалавек спіць: у сне ён не адчувае пах дыму, таму становіцца найбольш безабаронным і не можа адвесці ўдар стыхіі. Адной з гарантаваных мер своечасовага выяўлення задымлення і абвесткі аб гэтым з'яўляецца АПА.

– На гэтым тыдні Шчучыншчына прымае ўдзельнікаў патрыятычнага працоўнага праекта Рэспубліканскага штаба студэнцкіх атрадаў БРСМ «Зімовы маршрут», – распавяла намеснік старшыні райвыканкама Таццяна Цюсіна. – Удзельнікі студатрада «Азімыя» з аграрнага, медыцынскага і Купалаўскага універсітэтаў наведаюць шэраг школ раёна, дзе правядуць адукацыйныя і гульнявыя праграмы, майстар-класы, інтэрактыўныя заняткі па здаровым ладзе жыцця. Яшчэ адна важная задача атрада -- гэта папулярызацыя студэнцкіх атрадаў і дзейнасці БРСМ, валанцёрская дапамога пажылым людзям.

Таццяна Уладзіславаўна таксама адзначыла, што 28 студзеня ў краіне пройдзе рэпетыцыйны цэнтралізаваны іспыт. Удзел у ім прымуць каля 53 тысяч адзінаццацікласнікаў. У Шчучынскім раёне «рэпетыцыя» для 221 навучэнца будзе праходзіць у другой гарадской школе. Падвоз і рэгістрацыя вучняў XI класаў для ўдзелу ў ЦЭ, выдача пропускаў для ўваходу ў пункт ЦЭ, размеркаванне па аўдыторыях, выдача сертыфікатаў будзе таксама ажыццяўляцца ў гэтай установе адукацыі.

Рабочая нарада завяршылася аналізам крымінагеннай і пажарнай абстаноўкі ў раёне. Начальнік РАУС Аляксандр Рэба праінфармаваў, што за мінулы тыдзень узбуджана 7 крымінальных спраў. Зарэгістраваны разбойны напад на пажылую 82-гадовую жанчыну, у дом якой сярод белага дня пракраўся зламыснік у масцы і з сякерай. Аб здарэнні ў міліцыю паведаміла ўнучка пацярпелай. У выніку аператыўна праведзеных вышуковых мерапрыемстваў яго асоба была адразу ўстаноўлена.

-- За мінулы тыдзень адбыўся адзін пажар – у выніку пашкоджана гаспадарчая пабудова на тэрыторыі прыватнага домаўладання ў в. Амбілеўцы, -- далажыў начальнік Шчучынскага РАНС Аляксандр Малюгін.

Абмяркоўваліся на нарадзе і іншыя актуальныя тэмы.

Сяргей КАСПЯРЧУК.