Дарагая «паездка»

Наўрад ці думаў жыхар аднаго з аграгарадкоў раёна, што яго імпульсіўны ўчынак будзе мець такія непрыемныя наступствы. А варта было б... Бо, сеўшы нецвярозым за руль, да таго ж чужога трактара, ён «даехаў» да крымінальнай справы.
Падрабязнасці здарэння паведаміў намеснік начальніка РАСК С.Ч. Пецкель. Аказваецца, у той дзень мужчыну, які знаходзіўся на рабочым месцы ў стане алкагольнага ап’янення, «застукаў» кіраўнік вытворчага падраздзялення. Зразумела, ад працы яго адхілілі – адправілі дамоў. Аднак, выйшаўшы за вароты, мужчына... «дабавіў» гарэліцы і вярнуўся назад. 
– На тэрыторыі МТК на вочы нецвярозаму работніку трапіў МТЗ-82. Мужчына ўзабраўся ў незачыненую кабіну, павярнуў ключ запальвання, даў задні ход, – расказвае Сяргей Часлававіч. – Праехаць атрымалася каля пяці метраў – на шляху трактара аказаўся паветраны газаправод...
Незвычайнае «раллі» заўважылі іншыя работнікі прадпрыемства. Выклікалі ДАІ. 
Дарэчы, гэты чалавек раней у канфлікт з законам не ўступаў, станоўча характарызаваўся. І вось так бяздумна, праз гарэлку, за некалькі хвілін сапсаваў сабе біяграфію – стаў фігурантам крымінальнай справы, заведзенай па частцы 1 артыкула 214 Крымінальнага кодэкса Рэспублікі Беларусь. А гэта нішто іншае як угон. Ён прыцягнуты і да адміністрацыйнай адказнасці – за ўчыненне ДТЗ і кіраванне транспартным сродкам у стане алкагольнага ап’янення. Парушальнік аштрафаваны на суму 70 базавых велічынь, а гэта 1715 рублёў. Да таго ж пазбаўлены права кіраваць усімі відамі транспартных сродкаў на тры гады і павінен кампенсаваць страты за пашкоджаны газаправод. 
Па словах С.Ч. Пецкеля, раённы аддзел Следчага камітэта ўжо завяршыў расследаванне крымінальнай справы. Цяпер сваё слова скажа суд.
Таццяна ВІТАЛЬЕВА. Фота носіць ілюстрацыйны характар.

 
Подписывайтесь на нас в Telegram и Viber!