Асемянатар ААТ “Агра-ГЖС” Віктар Іванавіч Янковіч заняў трэцяе месца ў абласным спаборніцтве

Аператар па штучным асемяненні жывёлы малочнатаварнага комплексу “Астрына-777” ААТ “Агра-ГЖС” Віктар Іванавіч Янковіч заняў трэцяе месца ў абласным спаборніцтве па вывядзенні буйной рагатай жывёлы.

 

Павіншаваць перадавіка з чарговым працоўным дасягненнем прыехалі намеснік старшыні райвыканкама – начальнік упраўлення сельскай гаспадаркі і харчавання Анатолій Іванавіч Тодрык, прафсаюзны лідар аграрыяў Шчучыншчыны Генрых Іосіфавіч Юрэвіч і дырэктар ААТ “Агра-ГЖС” Віктар Генрыхавіч Паўлюкевіч.

 

– Выхад цялят у вас склаў 96 на 100 кароў, што з’яўляецца самым высокім паказчыкам у раёне, – зазначае Анатолій Іванавіч Тодрык. – Аднак спыняцца на дасягнутым нельга! Тым больш, што летась вы былі прызнаны лепшым асемянатарам Гродзеншчыны. Жадаю здароўя, удачы і новых працоўных перамог!
У прысутнасці спецыялістаў малочнатаварнага комплексу “Астрына-777” Анатолій Іванавіч уручыў Віктару Іванавічу Янковічу заслужаныя ўзнагароды – дыплом і грашовую прэмію.

 

– Я па прафесіі будаўнік, аднак сем гадоў таму дырэктар ААТ “Агра-ГЖС” Віктар Генрыхавіч Паўлюкевіч угаварыў мяне перакваліфікавацца ў асемянатары, – гаворыць Віктар Іванавіч. – З той пары не перастаю вучыцца і павышаць свой прафесіяналізм. Як вынік, апошнія тры гады ўваходжу ў тройку перадавых аператараў па штучным асемяненні жывёлы ў вобласці. Прывёў у жывёлагадоўлю і сваю жонку Наталлю Валянцінаўну, якая працуе лабарантам на малочнатаварнай ферме “Грамкі”. Цяпер працуем разам на карысць роднай гаспадаркі.

 

Аляксандр КАСПЯРЧУК.
Фота аўтара.

 
Подписывайтесь на нас в Яндекс.Дзен, Telegram и Viber!