Запрашаем на прышчэпку! У Шчучынскім раёне пачалася кампанія імунізацыі супраць грыпу

Работнікі Шчучынскага занальнага цэнтра гігіены і эпідэміялогіі ўжо прынялі актыўны ўдзел у гэтым мерапрыемстве і дружна зрабілі прышчэпкі. 

 

Дарэчы, на прыём у паліклініку ім звяртацца не прыйшлося: для іх зручнасці ўрач агульнай практыкі Вольга Сігізмундаўна Гейдзель разам з медыцынскай сястрой Аленай Дзмітрыеўнай Ступакевіч самі прыйшлі ў ЦГіЭ. Працэдура звычайная: спачатку агляд доктара, затым вакцынацыя. 

 

– Для таго, каб не захварэць, робім прышчэпкі ўсёй сям’ёй, – гаворыць урач-эпідэміёлаг Святлана Іванаўна Волчак. – Муж і сын – кожны год, а сёлета ўпершыню зробім прышчэпку і дачушцы. Як вядома, грып лепш папярэдзіць, чым лячыць. Асабліва небяспечныя наступствы гэтага захворвання – таксічнае ўздзеянне віруса на нервовую, сардэчна-сасудзістую сістэмы чалавека, а таксама падаўленне імунітэту і звязанае з гэтым узнікненне другаснай інфекцыі, якая выклікае бактэрыяльныя пнеўманіі, міякардыты, аціты…

 

Адной з першых, хто зрабіў прышчэпку супраць грыпу, была і галоўны дзяржаўны санітарны ўрач Шчучынскага раёна Анастасія Вячаславаўна Круковіч. 

 

– Пераканана ў тым, што самы лепшы спосаб абараніць сябе ад захворвання – прайсці вакцынацыю, – расказвае Анастасія Вячаславаўна. – Таму сёння мы запрасілі ў ЦГіЭ медыцынскіх работнікаў, каб усе нашы супрацоўнікі маглі, не губляючы часу, зрабіць прышчэпку. Сёлета для масавай вакцынацыі насельніцтва закуплена вакцына “Грыпол плюс” вытворчасці Расійскай Федэрацыі. Як і ў мінулыя гады плануецца прышчапіць супраць грыпу не менш за 40 працэнтаў насельніцтва – каля 15 400 чалавек. 5015 чалавек атрымаюць прышчэпкі за кошт рэспубліканскага бюджэту, больш за 7300 чалавек – за кошт сродкаў упраўлення аховы здароўя Гродзенскага аблвыканкама, і 3000 чалавек – за кошт сродкаў прадпрыемстваў і арганізацый. Зрабіць прышчэпку можна і платнай вакцынай – “Ваксігрып”. 

 

Прышчапіцца супраць грыпу важна ў кастрычніку-лістападзе да пачатку сезоннага ўздыму захваральнасці. На працягу 2-3 тыдняў пасля вакцынацыі сфарміруецца абаронны ўзровень антыцелаў ад віруса, які дапаможа арганізму не захварэць 4-6 месяцаў. У склад вакцыны ўваходзяць тры штамы віруса, найбольш актуальныя для гэтага сезона. 

 

– Хачу нагадаць, што да групы рызыкі захворвання на грып адносяцца асобы, якім больш за 65 год, дзеці і дарослыя з хранічнымі захворваннямі, а таксама цяжарныя жанчыны ў 3-ім трыместры цяжарнасці і дзеці ва ўзросце ад 6 месяцаў да трох год, а таксама работнікі розных сфер, якія па родзе сваёй дзейнасці знаходзяцца ў пастаянным кантакце з вялікай колькасцю людзей, і іншыя, – працягвае Анастасія Вячаславаўна. – Ім зрабіць прышчэпку проста неабходна. 

 

Як сведчыць статыстыка, дзякуючы прышчэпкам у апошнія пяць год не рэгістраваўся эпідэмічны ўздым захваральнасці на грып і вострыя рэспіраторныя інфекцыі, не зачыняліся на каранцін установы адукацыі, не рэгістраваліся смяротныя выпадкі, прычынай якіх стаў грып. Зрабіце выбар на карысць здароўя, прыходзьце на прышчэпку.!

 

Ганна РУДСКАЯ. 
Фота аўтара.

 
Подписывайтесь на нас в Яндекс.Дзен, Telegram и Viber!