З самай раніцы на Дне беларускага пісьменства ў Слоніме пачала працаваць маладзёжная пляцоўка
Сёння ў 10 гадзін раніцы ў Дзень беларускага пісьменства ў Слоніме пачала працаваць маладзёжная пляцоўка. Размясцілася яна на вуліцы Крайняга. Сланімчане і шматлікія госці горада з задавальненнем знаёмяцца з фотавыставамі, слухаюць канцэрт маладых выканаўцаў, удзельнічаюць у майстар-класах.
--На маладзёжнай пляцоўцы працуе актыўная моладзь БРСМ Слоніма, а таксама вышэйшых навучальных устаноў Гродзеншчыны, -- расказвае першы сакратар Слонімского раённага камітета БРСМ Таццяна Сеч. -- Прадстаўлена таксама і Беларускае таварыства Чырвонага Крыжа. На працягу дня будзе праходзіць канцэртная праграма, арганізаваная вышэйшымі навучальнымі ўстановамі. Кожны прахожы можа пакінуць свае водгукі на зорцы пажаданняў, падзяліцца там сваімі ўражаннямі ад свята. Свае работы выставілі маладыя мастакі, якія могуць намаляваць партрэт кожнага, хто пажадае.
Шматлікія мерапрыемствы, якія ладзяцца на пляцоўцы, прысвячаюцца 75-годдзю вызвалення Беларусі ад нямецка-фашысцкіх захопнікаў і 75-годдзю Гродзеншчыны. Многія ўдзельнікі свята прыйшлі сюды з фотаздымкамі родных, якія прымалі ўдзел у Вялікай Айчыннай вайне, і размясцілі іх на імправізаванай выставе – акцыя “Беларусь памятае” працягваецца.
Выставу, створаную з архіўных фота, прысвечаных тэме вайны і сучаснасці, прадстаўляюць судэнты ГрДМУ. І з такімі эксклюзіўнымі фотаздымкамі ўважліва знаёмяцца госці свята.
Студэнты гродзенскіх ВНУ падрыхтавалі тэматычную праграму і канцэрт «Дарогамі Перамогі». Сёння на маладзёжнай пляцоўцы ўвесь дзень будуць праходзіць акцыі, майстар-класы.
--Мы вучым усіх жадаючых, асабліва моладзь, аказваць першую медыцынскую дапамогу, -- гаворыць інструктар па аказанні першай медыцынскай дапамогі і камандзір атрада хуткага рэагавання і вышуку людзей Слонімскай раённай арганізацыі Чырвонага Крыжа Сяргей Брыш. – Можам усё прадэманстраваць на практыцы пры дапамозе манекенаў і патрэбнага абсталявання.
Асобную міні-пляцоўку займаюць прадстаўнікі літаратурнага клуба “Катарсіс” Гродзенскага дзяржаўнага медуніверсітэта на чале з намеснікам дэкана медыка-псіхалагічнага факультэта Віктарам Іванавічам Варанцом. Яны прадстаўляюць свае творы, а таксама выдадзеныя зборнікі.
--Мы прыехалі на свята, каб расказаць пра існаванне свайго клуба, выйсці так сказаць, на шырокія прасторы, -- гаворыць стараста студэнцтва клуба, студэнт чацвёртага курса лячэбнага факультэта Мікіта Андрэевіч Валько. – Рады, што трапілі ў такое асяроддзе творчых людзей.
Студэнты факультэта мастацтва і дызайна ГрДУ імя Я. Купалы рыхтуюць невялічкія сувеніры для жыхароў Слоніма. Яны малююць паштоўкі, прысвечаныя сённяшняму Дню беларускага пісьменства.
-- А нам вельмі падабаецца сама атмасфера свята, -- гаворыць Кацярына Хілімончык, першы сакратар Дзятлаўскага раённага камітэта БРСМ. – Мы суседзі, таму вельмі ганарымся, што Слонім так шчыра і добразычліва прымае гасцей, на такім высокім узроўні арганізаваў Дзень беларускага пісьменства.
Яшчэ многа сюрпрызаў чакае наведвальнікаў маладзёжнай пляцоўкі. Напрыклад, майстар-клас па стварэнні графіці, вячэрняя дыскатэка і многае іншае. Прыходзьце, не пашкадуеце!
Дарэчы, на свяце працуюць валанцёры руху “БРСМ” “Добрае сэрца”. Гэта навучэнцы Слонімскага дзяржаўнага медыцынскага каледжа і Жыровіцкага дзяржаўнага аграрна-тэхнічнага каледжа. Яны выдатны ведаюць горад і дапамагаюць гасцям арыентавацца на інтэрактыўных пляцоўках.
Ганна РУДСКАЯ.
Фота аўтара.