М6: знакі часовыя, кантроль пастаянны

Работы па рэканструкцыі М6 у самым разгары. У гэты час павышаная ўвага надзяляецца забеспячэнню бяспекі на ўчастках, дзе вядуцца будаўнічыя работы. Таму тут пастаянна прысутнічаюць экіпажы ДАІ. 

– Работы вядуцца на тэрыторыі трох раёнаў: Шчучынскага, Іўеўскага і Лідскага. Увесь час, пакуль ідзе рэканструкцыя, супрацоўнікі АДАІ РАУС штодзённа будуць несці тут службу, – гаворыць старшы інспектар упраўлення ДАІ УУС аблвыканкама Алег Дук. 

У ДАІ тлумачаць, што адным з самых небяспечных доўгі час лічыўся ўчастак трасы Мінск – Гродна у Шчучынскім раёне. 

– Звязана гэта з тым, што на адрэзку мноства перападаў: нізіна чаргуецца з ўздымам і закругленнямі дарогі. Асноўны від ДТЗ, якія здараліся тут, звязаны з тым, што вадзіцелі не прытрымліваліся правілаў абгону, перавышалі хуткасць. У выніку – лабавыя сутыкненні, перакульванні. Клопатаў дабаўлялі жывёлы, якія часцяком выходзілі на трасу. Пасля рэканструкцыі праезная частка будзе агароджана, а для міграцыі жывёл ужо амаль пабудаваны спецыяльны тунэль. Меры дазволяць знізіць аварыйнасць, зробяць трасу зручнай для кіроўцаў, – дадае Алег Дук. 

Спецтэхніка, занятая на рэканструкцыі дарогі, абсталявана пробліскавымі маячкамі аранжавага колеру. Вадзіцелі падчас працы на рамонтным участку абавязаны ўключаць блізкае святло фар. Рухацца з уключаным святлом рэкамендуецца таксама кіроўцам ўсіх транспартных сродкаў, якія праязджаюць дарогу транзітам. Папярэджваюць іх пра гэта інфармацыйныя шчыты, устаноўленыя на працягу рамонтнага ўчастка,гавораць у ДАІ.  

На перыяд будаўніцтва на трасе ўстаноўлены дзясяткі часовых знакаў абмежавання хуткасці. Знакамі пазначаны выезды на трасу з кар’ераў: на гэтых участках хуткасць руху абмежавана да 50 км/г. На падходах да ўчасткаў часовых аб’ездаў устаноўлены дадатковыя шчыты індывідуальнага праектавання, выраб якіх ініцыявала ўпраўленне ДАІ УУС аблвыканкама. Знакі інфармуюць аб змене кірунку руху. 

Нагляд за дарожна-транспартным становішчам і захаваннем парадку на гэтай тэрыторыі рэканструкцыі аўтамагістралі і надалей будзе праводзіцца ва ўзмоцненым рэжыме,  дадалі ва ўпраўленні ДАІ УУС аблвыканкама. 

Фото Алы БІБІКАВАЙ.

Кацярына ВЕСЯЛУХА, "ГП".