Косяць хутка, нарыхтоўваюць якасна

У ААТ “Дэмбрава” першы ўкос паступова набліжаецца да завяршэння. Па даных на 13 чэрвеня, у гаспадарцы ўжо абкошана 2245 га траў, што складае 69% да плана.

З сямі гадзін раніцы і да позняга вечара працуе ў полі механізатар В.С. Богдан: на айчынным камбайне “Палессе” падбірае падвяленую траву – да 400 тон у дзень. 
– Няўстойлівае надвор’е ўносіць свае карэктывы ў ход касавіцы, аднак мы выкарыстоўваем кожную пагодлівую хвіліну, каб скасіць травы ў аптымальныя тэрміны, – гаворыць Вацлаў Станіслававіч. – Тэхніка не падводзіць. Безумоўна, дробныя паломкі здараюцца, але ўсе яны аператыўна выпраўляюцца прама ў полі. На камбайне “Палессе” падбіраць падвяленую траву камфортна: ён просты ў кіраванні, да таго ж у кабіне ўсталяваны кандыцыянер. 


Побач з Вацлавам Станіслававічам у полі працуе трактарыст Юрый Іванавіч Чашчэвік, які адвозіць зялёную масу да сянажных траншэй.

– Сёлета мне даверылі новы трактар “Беларус-1221” з 15-тонным прычэпам, – зазначае Ю. І. Чашчэвік. – На ім за працоўную змену “накручваю” прыкладна 200 кіламетраў, перавожу каля 100 тон падвяленай зялёнай масы.
Усяго ж на касавіцы ў ААТ “Дэмбрава” задзейнічаны 4 касілкі, столькі ж камбайнаў-здрабняльнікаў, 4 МАЗы і 10 трактараў з прычэпамі. Штодзень дэмбраўскія аграрыі скошваюць каля 150 га траў, закладваюць у траншэі да 1200 тон сенажу. Дарэчы, трамбоўка кармоў у гаспадарцы ідзе кругласутачна.
– У звязцы з механізатарам Аляксандрам Пятровічам Ліцінскім мы трамбуем сянаж амаль увесь светлавы дзень, а ноччу нас падмяняе механізатар Уладзіслаў Іосіфавіч Семянчук, – зазначае вадзіцель “Амкадора” Уладзімір Аркадзьевіч Астапенка. – Харчуемся тут жа, ля сваіх “жалезных волатаў”. За абед і падвячорак плацім усяго 30% ад іх рэальнага кошту, астатнія выдаткі бярэ на сябе гаспадарка. 
Галоўнага агранома ААТ “Дэмбрава” Д.С. Скарба ў гэтыя гарачыя для аграрыяў дні не ўбачыш у кабінеце: ён то замярае ў полі ўтрыманне вільгаці ў свежаскошанай траве, то кантралюе якасць закладкі кармоў.


– Пасля далучэння да нашага сельгаспрадпрыемства зямель Шчучынскай птушкафабрыкі рабо­ты значна прыбавілася, – дзеліцца Дзмітрый Станіслававіч. – Сёлета неабходна абкасіць 3236 га траў. Першым укосам плануем залажыць 60-65% ад неабходных гаспадарцы кармоў. 2,3 тысячы тон сенажу запакуем у плёнку: пры такой тэхналогіі корм захоўвае ўсе карысныя рэчывы і застаецца свежым нават зімой. Калі надвор’е не ўнясе свае карэктывы, завершым першы ўкос траў да 20 чэрвеня.
Аляксандр КАСПЯРЧУК. Фота аўтара.

Голосов пока нет

Добавить комментарий

CAPTCHA
Этот вопрос задается для того, чтобы выяснить, являетесь ли Вы человеком или представляете из себя автоматическую спам-рассылку.
Введите ответ (Fill in the blank)